Vawiin Dt. 25.07.2016(Thawhlehni) chawhnu dar 2:00 khan Aizawl-a Government Mizo High School Hall-ah SSA - TATA Trusts Grassroots Football Development Programme kalpui mekah Ambassador atan Jeje Lalpekhlua lawmluhna hun hman a ni a.

Parliamentary Secretary Pu Joseph Lalhimpuian a hmanpui a ni. Parliamentary Secretary chuan thusawiin Football Training Centre 60 ah naupang sangthum(3000) an awm mek a, heng naupangte nakin lawkah India rama Mizote tihmingthatu an nih kan beisei, a ti a. Mizo te tihmingthatu Jeje Lalpekhlua kan nei hi a lawmawm a, a thawhrimna Pathianin mal a sawm a, Pathian hming a tiropui a, Mizote a tihmingtha hle a ni tiin, amah anga awm thei turin zirlai lo kalkhawmte chu a chah a, Parliamentary Secretary hian Jeje Lalpekhlua chu Ambassador atan lawm lutin Chibai a buk a ni.

Jeje Lalpekhlua pawhin thu sawiin naupang lokal khawmte chu sorkar hmalakna avanga an tet lai atanga hetianga Football training-na nei thei an ni chu an vanneih zia hre tur leh hlawhtling turin thawhrim leh thuawih a ngai hle a ni a ti a. Coach te thuawih a pawimawh a. Football khel paha lehkha pawh a thiam pawl ni zel tur leh eng pawh tih dawn in hmun danga awm thei a, chung atan chuan tawng thiam a tul thu a sawi a, Football khelh paha lehkha thiam tel a tul thu uar takin a sawi bawk.

Pu Lalnghinglova Hmar(Tetea), Mizoram Football Association Honorary Secretary pawhin he hunah hian thu sawiin Sorkar hmalaknaa SSA-TATA Trusts Grassroot Football Development Project hnuaia Training centre te hi MFA hmathlir a ni, a ti a. Heng training Centre hrang hranga hmeichhiate chu Hmeichhe Football team atana an hmathlir an nih thu a sawi bawk.

Ambassador atana Jeje Lalpekhlua ruatnaah hian Pu Lalhmachhuana State Project Director, SSA; Jeje Lalpekhlua leh Pu Lalnghinglova Hmar Honarary Secretary, MFA ten hming an ziak a ni.