180/2025-2026

Siaha the 15th April 2025: PHE Department, Saiha Division Sr EE, Pu Viasai Solo chuan a hnuai tarlan ang hian tui remchan chungchang hriattirna leh mipui hnena ngenna a chhuah.

 MIPUI TE HNENA HRIATTIRNA LEH NGENNA

Kan hriat țheuh angin kumin țhal hi a nat em avâng leh kan tui lâkna tuihna te a kiam nasat em avângin Mizoram khaw hrang hrangah tui lamah harsatna namen lo a thleng mêk a. A bikin Lunglei leh District khawpui dangte pawh tui ah kan buai em em theuh a ni.

Hetih lai hian duhthusâm khawp chu nilo mahse, District khawpui dang ngaihtuahin Siaha chu kan la zia deuh zawk a. Amaherawhchu, District khawpui dang harsatna ang hi tawk ve thei reng kan ni. Hei hi kan lo hriat lawk a, Siaha District mipuite leh a bik takin Siaha khaw mipuite kan tui neih ang angte renchem leh khawlkhawm nachâng hre turin kan in chah a.

Tui hman tam a ngaihna ang chi programme (ruai țheh, camping, motor sil, khawchhunga blanket sûk inhlawh, etc.) pawh țul bikah lo chuan buatsaih rih loh nise a tha ang. 

Tin, Treatment plant kaltlanga PHED tuisem nilo; Tuikhur tui, Truck tui chawi ,etc (Untreated Water) hi mi tam takin kan hmang lo thei lova, mahni phâk ang tawkin kan in tur bik hi tih thianghlim hmasak a pawimawh hle tih I hre tlâng theuh bawk ang u. Khawlum lai hian mitin in tui kan in tam a, Tui tih thianghlim loh (Untreated water) kan in palh chuan tui atanga natna kaichhawn theih (Water borne diseases) kai leh theh darh a awlsam hun lai tak a nih avangin Mitin fimkhur tlang theuh turin kan in ngen a ni.

Hetih lai hian PHED Siaha chuan theihtawp a chhuah reng dawn tho a, Mipui te'n tuihna humhalh leh enkawl bâkah mipui hnenah semdarh kawnga kan remruat dân leh ngenna che u min zawmsak a min thawhpui zel turin kan ngen a che u.

TUI CHHUANSO /THIANGHLIM CHAUH IN THIN ANG CHE