887/2022-2023
Aizawl, the 13th June 2022: Public Health Engineering Department(PHED) chuan kan lo him tlan zawk na turin a hnuaia tarlan ang hian lei verh hmanga lei hnuai tui lakchhuah chungchangah mitin ten kan zawm theuh turin hriattirna pawimawh a siam.

“Mizoram State chhungah leilung zirchianna awm hmasa lo leh pawi nasa zawk a thlen theih te thlir hmasa lovin lei chhung tui la chhuak tura lei verh hmun hrang hrangah a awm thin tih hriat a ni a, heng hi khawtlang mamawhna bakah zawrh sum atan leh mimal hman atana tih a ni thin tih hriat a ni bawk a. Heng lei hnuaiverh hian a hnuaia tarlan ang hian nghawng tha lo leh pawi nasa tak a thlen thei a ni :-

1. Lei tla hniam siamtu a ni. Lei tlahniam hi a chhan bul ber chu a hnuaia dotu lak sawn vang a ni a. Lei chhung tui lak chhuah vak hian a chunga lei chu a chim a, a lo tlahniam ta thin a ni. Lei tlak hniam chhan tarn tak chu mihring kutthlak vang a ni a, chu pawh a hnuaia tui lak chhuah nasat luat vang a ni thin.

2. Lei chhung tui te hi lei hnuai thuk zawkah an inzawm vek avangin hmun thenkhata laih chhuahvak an nih hian tuihna dang tuikhur, lui leh dil etc te a tlak hniam phah thei a ni.

3. Lei chhung tui hi inkhawl khawm hman lo khawpa lak chhuah a nih chuan tuihna dang a ti kang chat a, lak phak loh khawpa thukin a tlak hniam phah thin.

“Heng chhan hrang hrang avang hian Nodal Department i.e PHE Deptt-a mithiam te'n hmun him tha ni a an hriat hmunah chauh lei chhung tui la chhuak tura lei verh hi tih tur a ni.”

Chuvangin The Mizoram Water Supplies (Control) Rules, 2006 Rule 6 in a sawi angin a hnuaia thu te hi tih chhuah a ni:

1. PHE Department hi Tuihna hrang hrang - Lei chhung leh pawna mi leh a chhehvelte humhalh, enkawl, vawn him kawngah thuneitu a ni.

2. Mi tumahin tuihna ti tlem thei zawng leh tibawlhlawh zawngin hma an la tur a ni lo.

3. PHE Department phalna la hmasa lovin heng leichhung tui te hi lakchhuah/verhchhuah leh hman phal a ni lo.

A chunga sawi tak te hi bawhchhiat anih chuan The Mizoram Water Supplies (Control) Act, 2004 Section 17(5) in a sawi angin hremna pek theih a ni.”