888/2022-2023
Kolasib dated June 13th 2022 : Mizo Zirlai Pawl Headquarters, Kolasib buatsaihin Parish Hall, Venglai, Kolasibah Kum 2021-22 Class 10 leh 12 zirlai titha chawimawina hun neih a ni a, Food, Civil Supplies & Consumer Affairs Department Minister Pu K Lalrinliana, Kolasib Assembly Constituency bialtu MLA chuan khuallian niin a hmanpui.

Minister Pu K Lalrinliana chuan board exam result chhuak a zirlai pass zawng zawngte a lawmpui thu sawiin sawrkar hna chauh a innghat lo turin leh ram hmasawnna tur leh mahni intundinna khawp thiamthil neih a pawimawh thu a sawi a. Sawrkar pawhin a puitlinga a ngaih chin zirlai kum 18 chin tawh tan phei chuan hmalam hun tur uluk tak a chhut chunga zirna kawng zawh chhunzawmnaah duhthlanna fim tak hmang turin Minister chuan zirlate chu a chah a, ei leh bar a intodelh tur a tan lak a pawimawh thu a sawi.

Central Service-ah Mizo inziak tling an tlem chhoh thu sawiin Supply Minister chuan tun atangin tum chiang tak neih leh mumal tak a inbuatsaih a tul thu sawiin zirna kawng a ramin hma a sawn theihna tur chuan nu leh pa leh khawtlang mipuite pawh an pawimawh thu a sawi.

Hun hmanpui tura rawn kal Pu Chinkhanmanga Thomte, Asst Gen Secretary, MZP General Hqrs chuan zirlaite chu ram nghahfak an nih avangin tun atanga inbuatsaih sauh sauh turin a fuih a, zirna tibuai thei zuk leh hmuam bakah ruihtheih thil lak a insum turin a chah a ni. MZP Hqrs, Kolasib president Pu C Lalruatdika pawhin zirlaite fuihna thu a sawi bawk a ni.

Zirlai titha chawimawina hunah hian school sawm bik thenkhata zirlaite an tel a, pawl 10 distinction-a pass mi 14 bakah pawl 12 naupang, first division leh a chunglam a pass mi 120 te hnenah lawmpuina — memento, pawisa fai leh Pu Lalhruaitluanga lehkhabu ziah 'Zirna Kailawn' pek vek an ni.