Vawiin khan Aibawk BNRGSK Hall-ah Aibawk Water Supply Scheme hawnna hun neih a ni a. Public Health Engineering Department (PHED) Minister Pu Zodintluanga chu Khuallian niin Agriculture etc Minister leh Bialtu MLA ni bawk Pu K.S.Thanga chu Khualzahawm a ni a. He hun hi Public Health Engineering Department (PHED) buatsaih a ni.

PHED Minister Pu Zodintluanga chuan Aibawk, Phulpui leh Sateek khua ten tui thianghlim mahni in ngeia herh haw theihna tur scheme hawn a ni chu lawmawm tiin heng khaw mipuite tan chuan Ni chhinchhiah tlak tak a ni, a ti a. Mihringte hi tui awmlo in kan khawsa thei lova, Water Supply Scheme kan neih hma chuan mahni hna pawh thawk hlei thei lovin tui kan buaipui a ngai thin a, tunah chuan tui in tur tih thianghlim sa mahni in theuhah kan nei thei ta a, a lawmawm hle a ni, a ti a. Khaw tam tak chawmtu tuipui luite hi a phai chak em em a, kan tui lakna lui hi  a thianghlim mai piah lamah a kang lohna turin khaw hruaitute chuan hma kan lak a tul a ni tiin khaw pathum hruaitute chu tui humhalh kawngah theihtawp chhuah turin a chah a.  PHED Department hnuaiah hian  Sialsuk leh Samlukhai tui lak tihchangtlunna tur hnathawh tan mek a ni a, Sailam Water Supply Scheme pawh tun atanga reilo te-ah thawh tan tur niin NRDWP (National Rural Drinking Water Programme) hnuaiah Thiak Water Supply Scheme hnathawh tan a nih theih nan hmalak mek a ni bawk a ni, a ti a.  Sanitary Complex pawh Kelsih, Hualngo, Sateekahte buaipui mek a nih thu a tarlang a ni.

Khualzahawm Pu K.S. Thanga chuan hun rei tak atanga mipuiin an beisei Aibawk Water Supply Scheme hawnna hun neih a ni chu lawmawm a tih thu sawiin hmasawnna pawimawh tak a nih thu a sawi a. Tui harsatna in henglai khuate hi a tibuai thin a, Sateek-ah pawh Hmuifang kham kar ami tui lak thin niin tui kham khawp mipuiin an hmu lo thin a ni tiin Non-Lapsable Central Pool of Resources (NLCPR) atangin tui hnianghnar taka mipui ten an dawn theih nan Aibawk Water Supply Scheme (WSS) chu peihfel a ni ta a, mipuiin an tangkai pui hle dawn a  ni, a ti.

Aibawk Water Supply Scheme hi Ministry of DoNER-a NLCPR hnuaia hnathawh kalpui niin cheng nuai 979.42 a zawh fel a ni a. Kum 2014 atang khan hnathawh tan niin khaw pathum Aibawk, Sateek leh Phulpui ten hnianghnar takin tui an nei theihna tura hmalakna a ni a. Heng khaw pathum-ah hian mi 3242 (2011 census) cheng an awm a, Water Supply Scheme hmang hian mi 1 tan nitin tui thianghlim litre 70 dawng thei tura ruahmanna siam a ni. Aibawk Water Supply Scheme hi a hnar chu Phulpui atanga km 3 vela awm  Tuirivang lui a ni a. Tuirivang atang hian sedimentation tank-ah tui lakluh phawt a ni a. Chumi a tlak fim hnu chuan thlitfim leh niin natna hrik laka venna chlorination hmanga tih thianghlim leh a ni a, hemi hnu hian tui chu tui thianghlim dahna Clear Water Slump atangin Main Reservoir-ah pump luh a ni a. Main reservoir atang hian Aibawk, Sateek leh Phulpui Zonal Tank-ah chhung lutin public point leh house connection hmangin mipui hnenah tui thianghlim hi pek a ni ta a. Tun dinhmunah hian public point 78 leh house water connection 598 a awm mek a ni. Electric power pek nan Transformer 250 KVA Capacity a awm bakah power supply awm loh changa tui pump a khaihlak loh nan Generator 180 KVA bun a ni bawk. Kum 2045 thlengin mipui 8255 (design population) hnenah tui hnianghnar taka pek an nih theih nan he scheme hi duan a ni a. March Ni 3, 2016 khan khawl tih nun tan (trial run) neih a ni a, hemi ni atang hian Aibawk Water Supply Scheme hi hman tangkai nghal a ni.

PHED E-in-C Pu Lalmuanzova chuan kalkhawmte lawmna thu a sawi a. PHED SE Pu H.C Lalnunzira atangin technical report ngaihthlak a ni a. PHED Zone I CE Pu C. Lallunghnema chuan lawmthu sawina in hun a khar a ni. He hunah hian PHED hotute, Aibawk BDO, Aibawk, Phulpui leh Sateek Village Council, Sports Council hotute leh tlawmngai pawl hrang hrang an tel a ni.