498/2025-2026

Aizawl dated 20th May 2025: Vawiin chawhnu khan Prof. Lalnilawma, Minister, Public Health Engineering Department chuan Muallungthuah NESIDS OTRI hnuaia hmalakna 'Alternate Gravity Water Supply Scheme of Aizawl' chu  khuallian niin a hawng a. Pi Teresy Vanlalhruaii, Secretary, PHED chuan hun kaihruaiin Er. Zodinthari, CE Zone- I chuan Technical report a pe a. Pi Baryl Vanneihsangi, MLA, Aizawl South III chuan he hun hi telpuiin Er. H.Duhkima, E-in-C chuan lawmthu sawina hun a hmang bawk a ni.

PHE Minister Prof. Lalnilawma chuan kum 2018 atanga kum 2025 thlenga Sawrkarna siamtu party pathum leh PHE Department a thawktute thahnemngaihna leh inpekna avanga Project hlawhtlinna kan hmu thei chu lawmawm a tih thu a sawi a. Khawl leh kawlphetha rin ngai lova awi tlan behchhan a tui lakkhawl leh sem theih tur a ruahmanna chuan inrenchemna kawngah nasa takin hmasawnna a thlen ngei a beisei thu a sawi bawk a ni. 

'Alternate Gravity Water Supply Scheme of Aizawl' hawng thei tura hmalakna kawng a thui zia leh harsatna hrang hrang paltlang a nih thu Minister chuan sawiin, he hlawhtlinna chang thei tura inlungrual taka tanrualna leh thawhhona nen hmalakna kalpui a ni chu thawktute fakawm a tih thu a sawi a. Tui chu khawtlang hrisel nan leh hmasawn nana thil pawimawh berte zing ami a nih angin he scheme hawnna hian Muallungthu leh a chhevel khawtlangah hmasawnna hmel thar a thlen tir ngei a beisei thu a sawi. 

Prof. Lalnilawma chuan tui hi ram leilung hausakna mi tin intawm a nih angin tui renchem kan inzirtir a pawimawh bak ah tui hna humhalh kawngah kan thanharh zel a pawimawh tel thu a sawi a. Hmasawnna inbuktawk, ram leilung hausakna humhalh chunga kalpui thiam a tul thu a sawi.

Pi Baryl Vanneihsangi, bialtu MLA chuan Muallungthu leh a chhevel khua chawmtu tur 'Alternate Gravity Water Supply Scheme of Aizawl' hawn a ni ta chu lawmawm a tih thu a sawi a. Hmasawnna rotling a awm zel theih nan beiseina sang tak neih a pawimawh thu leh chu beiseina tihlawhtling tur a taimakna neih a pawimawh bawk thu a sawi a. He hmalakna hlawhtlin nana a sulsutu leh hmalatu department-a thawktute leh a hmun petu, Muallungthu khawtlangte chungah lawmthu a sawi bawk a ni.

Technical report-a tarlan danin he project hi NESIDS funding hnuaiah cheng Vaibelchhe 117.3035 seng a siam a ni a, a hna hi Kram Infracon Pvt leh Vikas Associates te tangkawp thawh a ni . He project ah hian tui litre Vaibelchhia 248 dawng 'Earthen Dam' tuikhuah, Hualtu ram chhunga Dilzawl hmunah siam a ni a. Tui hi sawngbawl a nih hnu ah 450 mm a lian pipe km 39 a sei hmangin Muallungthu tlanga tui dahkhawlna, Reservoir, tui litre nuai 15 khawl theihna ah chhun luh a ni a. Muallungthu ram Khumtung peng atang hian tui 3 Million Litre per Day (MLD) hi pipe 200 mm a lian hmangin km 13 a thui pipe hmangin Trinity Hospital bul thleng luang phei lehin helai ah hian lak pen leh a ni a.  Mualpui lam ah 2 MLD leh Mission Vengthlang lamah 1 MLD chhun luh leh tur a ni ang a. A pipeline zawng zawng thui zawng hi km 66 a ni.