499/2025-2026

Lunglei, 2025 Ṭomir thla ni 20: Vawiin khan Lunglei District Deputy Commissioner (Bawrhsap) Office leh Lunglei Officers' Club (LOC) te ṭang kawp huaihawtin Lunglei DC Conference Hall-ah Lunglei District mi High School Leaving Certificate (HSLC) leh Higher Secondary School Leaving Certificate (HSSLC) Examination, 2025-a top 10-a langte leh Mizoram Civil Services (Combined Competitive) Examination, 2025-a hlawhtlinna changte lawmpuina hun buatsaih a ni.

He hunah hian Lunglei DC Office chuan MCS (CC) Examination, 2025-a hlawhtlinna chang Lunglei District mi pathum - (1) Lalhriatpuii Phutin, D/o P. Lalrinmawia, Ramzotlang, Serkawn (MCS); (2) C. Ramdinpuii Zorem, D/o C. Zorema, Ramzotlang, Serkawn (MF&AS); (3) Zodinsanga Khiangte, S/o Dr K. Lalsanga, Chanmari, Lunglei (MPS) te lawmpui nan thuziak leh lawmpuina thilpek an hlan a. HSLC 2025-a Mizoram puma parukna H. Remsangliana, S/o H. Lalmuankima, Theiriat, Lunglei (BHSS) bakah, HSSLC 2025-a topper-te - (1) Gabriel Lalrinpuia, S/o Crosshmingthanga, Venglai, Lunglei (4th Position in Science Stream); (2) M. Lalmuanzuala, S/o M. Lalramthanga, Chawnpui, Tlabung (5th Position in Arts Stream); (3) Rosy Lalchhandami, D/o PC Lalzarliana, Venglai, Lunglei (10th Position in Arts Stream) te hnenah Lunglei DC Office leh Lunglei Officers' Club chuan chawimawina thuziak leh ₹ 5,000/- ṭheuh an hlan ve ve a. Lunglei DC Office hian Lungleia Baptist Higher Secondary School (BHSS) chu zirlai HSLC topper (6th Position) an neih avanga an lawmpuina leh chawimawina thuziak an hlan bawk.

Lunglei District Additional Deputy Commissioner Pi Rochuangkimi Khenglawt kaihhruaia hun hmanah hian District Bawrhsap Pi Navneet Mann chuan zirlai ti ṭhate leh MCS (CC) exam-a hlawhtlingte leh an nu leh pa leh zirtirtute a lawmpui thu sawiin, an hlawhtlinna chu Lunglei District tan inchhuanna tham leh mi dangte chona petu tur a nih thu a sawi a. Mi hlawhtling ni turin zirna a pawimawh tih sawiin, an zirlaia an tih ṭhat chu duh tawk mai lo va, hlawhtlinna duhawm zawk chang zel tura rahbi pawimawh atan hmang turin zirlaite a chah a. Exam hautak tak hmachhawn hnua hna hmu tate pawhin duh tawk zui mai lo va, phur taka thil thar zir belh zel tura chahin, sikula zirlaite aṭanga mahni kea ding tawhte chenin mi tinin thil thar zir belh zel chu mi hlawhtling leh mite tana malsawmna ni thei turin a pawimawh a ni, a ti.

He hunah hian Lunglei DC Office-a officer leh staff-te, LOC member-te, exam-a hlawhtlingte leh topper-te leh an chhungte leh zirtirtute an tel a. LOC Vice President Pu Lalrotluanga'n fuihna thu sawiin, BHSS Principal Pu C. Lalhmingmuana leh chawimawina dawngtute aṭangin thu sawi ngaihthlak a ni bawk.

Lunglei District-a zirnain hma a sawn theih nana an hmathlir leh hma lakna peng khat atan Lunglei Officers' Club hian HSSLC Examination 2024-a Science Stream-a top 10-a lang Lunglei District mi zirlai pahnih (4th & 10th) chu nikum khan chawimawina an lo hlan tawh a ni.

Attachment

  • Loading attachment...