2605/2026-2027

Dated Aizawl, the 9th October 2026: Vawiin khan PHE Department Minister, Prof. Lalnilawma chuan Greater Aizawl Water Supply Scheme (GAWSS) Phase-I hmunhma enfiahin thawktute nen hmalak tawh chinte an thlir ho va. Tun dinhmunah hnathawh tur 50% aia tam zawh fel a ni chu lawmawm a tih thu sawiin hna an zawh fel hma chu mipuite’n dawhtheihna nen lo hrethiam hram turin a ngen a ni.

PHED Minister chuan Cyclone Remal-in chhiatna a thlen avanga thawmthat hna (Retrofitting) thawh hrang hrang – Tlawng lui atanga tui pump chhuahna (VT Jackwell), tui thlitfim sa pump chhuah tur dah khawlna (Clearwater Sump) leh Clearwater Pumphouse-a tui pump-na leh a kaihhnawih khawl chi hrang hrang dahna te chu a hmunah enfiahin hnathawh tawh chin leh an hmabakte chu PHED official-te nen an thlir ho va. Minister chuan tuilian avanga khawl dahna leh hmunhma pawimawhte tih san a nih dan chu tha a tih thu sawiin an hmanraw hman pawh PWD-ten an test vek a nih avangin rintlak ni a a hriat thu a sawi a. Khuarel chhiatna avanga mipuiten tui hnianghnar taka an dawng thei lo chu hrehawm a tih thu sawiin thawktute chu theihtawp chhuaha, tan la lehzual turin a chah a. Chutih rual chuan theihtawpin hma an la mek a ni tih mipuiten hria a, lo hrethiam rih hram hram tura ngenin hna an zawh fel hma chu tui lo renchem thiam turin a chah nghal a ni. GAWSS Phase-I hnunhma enfiah zawh hian Phase-II hnuaia hmalakna thenkhatte thlir ho a ni bawk.

VT jackwell retrofitting hna hi 50.14% zawh tawh niin Clearwater Pump House retrofitting hna hi 47.53% zawh a ni tawh a, Clearwater Sump retrofitting hna hi 59.77% zawh a ni bawk. Tlawng Lui lian in a chim phak loh tura sanga siamthat vek niin chutiang tur chuan tui pump khawl leh a building thiah hna hi February ni 3, 2026 khan thawh tan a ni a, June ni 1, 2026 atang khan Phase-I in tui a pump chu tihtawp lailawk a ni. A hma thei ang bera tui pump leh thei tura hna chhunzawm zel niin tunah hian hna hi 52% vel thawh zawh tawh a ni a, hna hi a tluan chuan kumin December thla chhungin Civil works bik chu zawh hman beisei a ni.

GAWSS Phase-I leh Phase-II hna hi ‘SASCI 2024-25 Part-I Cyclone Remal’ atanga thawh niin a project amount hi cheng vbc 11.81 a ni a. Phase-I hi full capacity-a a thawh chuan ni khatah tui litre vbc 10.8 (10.8 Million lpd) pe chhuak thei tura beisei niin Phase-II hian ni khatah tui litre vbc 24 (24 million lpd) vel pe chhuak thei tura beisei a ni bawk.

PHED Minister hi Er. H.Lalsiamliana, SE, Aizawl WATSAN Circle; Er. K.Lalrintluanga, Sr.EE, Azawl Water Transmission Division; Er. Lalhmangaihzuala, SDO, Aizawl Water Transmission Sub-Division; Er. H.L. Thangvuta, SDO, Power Sub-Division; Er. Vanlalthlengliana, SDO, Aizawl Water Transmission Mechanical Sub-Division leh Er. Abraham Malsawmdawngzela, SDO (TC), Aizawl Water Transmission Division bakah Officials dangte’n an tawiawm a ni.