2604/2026-2027 

Siaha the 9th October, 2026: Siaha District Bawrhsap Pi Saizikpuii chuan vawiin khan Mara Thyutlia Py (MTP) din champha vawi 72-na chu Thiahra khua-ah Khuallian niin a hmanpui.

Pi Saizikpuii chuan ropui taka lo hmuaktu Thiahra khaw mipuite chungah lawmthu sawiin, Mara rama NGO lian ber MTP Rising Day vawi 72-naa Khuallian tura an sawm avangin lawmthu a sawi a. Day hlimawm tak hmang turin duhsakna a hlan nghal bawk.

An khuaa mi hmingthang leh ropui te hriatrengna lung an phun chu entawntlak a tih thu a sawi a, chawimawi phu te khawtlangin a chawimawi thin chu thil tha tih intihhmuh kawngah nasa takin a khalh ngil thin a ti.

Thiahra khua chu a fai hle tiin fakawm a ti a, faina ngai pawimawh zual sauh turin leh naupangte atanga zirtirna uar turin a chah. Mahni nuna a beh tlat tawh chuan puitlin hnuah a hrana zirtir a ngai tawh lo a, mi mal a fai chuan khawtlang a fai a, ram a lo fai mai thin a ti bawk.

Mizoram Sawrkar chuan District tinah Drug Free Village tam thei ang bera siam a tum tiin, hemi kawnga an thawhhlawk thinna avangin MTP leh NGO dangte chungah lawmthu a sawi a. Drug Free Village - ruihhlo awm lohna khua ni thei tura tan la turin a fuih bawk.

Social media khawvelah fimkhur a tul hle a, mahni thiamna leh theihna tahhriam nana hman thiam a ngai a, hun khawhral nana mai mai hmang lo turin a chah bawk a ni.

Thiahra bialtu MDC Pu Lalmalsawma Zasai pawhin kalkhawmte chu MTP Day chibai bukin, hlim leh lawm taka hmang thei turin duhsakna a hlan bawk.

District Bawrhsap chuan he ni denchhan hian Thiahra khuaa mi ropui leh hmingthang pathum - Kum 1914-a British Sipai Pu Chiatlo Chozah, unau huaisen Pu Rôtha Siangy leh Pu Thazaw Siangy te, leh mi chak hmingthang Pu Khaibi Vytuchho te thlan lung hawnna a nei nghal.

Vawiin hun hi Pu N. Beisialai, Vice President, MTP Branch Thiahra chuan a kaihruai a, President Pu K. Beirapachha chuan inlawmna thu a sawi a, Treasurer Pi HC. Lalsiamthari chuan lawmthu sawina a nei bawk.

Mara Thyutlia Py (MTP) hi kum 1954-a din a ni a, Siaha-a tlawmngai pawl lian ber niin, Mara thalai kum 14 chin chunglam an awm thei a ni.