Vawiin chawhnu khan  Secretariat Conference Hall-ah PHE Minister Pu Zodintluanga chuan PHE Department hotute kawmin Aizawl khawpui chhunga PHE tui connection atanga tui pek chhuahdan leh mipui harsatna chinfelsak dan tur  a sawipui. 

Nipui lai a chhungkaw tin te tui mamawh tam zual lai a nih avanga tuisem hnathawh vil uluk  a tul thu PHE Minister Pu Zodintluanga chuan a tarlang a.  Rualkhai zawka tuisem a nih theih nan PHE Department hnathawkte chu a hotulu atanga a hnuailam hnathawk thlenga inpawhtlang taka an tan mar pat a ngai a ni a ti a. Veng thenkhatah kar khat chhunga tui vawikhat tal dawng lo an awm tih a hriat thu sawiin he harsatna hi PHED engineer ten an chhuizui mek a, a ranglam a chinfel  thuai a ni ang a ti. 

PHED aiawh hian Er.Lalmuanzova, E-in-C, PHE leh a thawhpui senior official te bakah Aizawl khawpui chhunga tuisem leh Pump enkawltu  Engineer te an tel a. PHE hotute chuan Minister hnenah tui pump chhoh tam lamah harsatna a awmloh rualin sawrkar hmalakna kal mekah pipe hlui te pipe thara thlak a nih avang te in a semchhuah kawngah an duhthu sam lo lai te a awm tih an sawi a. Kar khat chhunga vawi khat tal veng tinah semchhuah a nih ngei nan hmalak mek a nih thu leh a remchan dan angin SDO leh JE te pawh an naute tuisem enfiah pui tura an penchhuah thin tur thu te, tuisem hna thawk thalo chungah PHE Department chuan khauh takin hremna a lekkawh dawn tih an tarlang a ni.