569/2022-2023 

Champhai, the  20th May, 2022: Plastic hman tawh tangkai zawka hman a nih theih nana sawngbawlna khawl Plastic Waste Resource Management  Centre (PRMC), PHED Complex, New Champhaia mi chu vawiin chawhnu dar 1:00 khan PHE Department Secretary Er. Lalmuanzova chuan a hawng.

Plastic Waste Resource Management Centre hawnna pual hian thu sawiin Er. Lalmuanzova chuan plastic chuan mihring tan tangkai hle mah se a tawih ral theih loh avangin bawlhhlawh siamtu lian ber a ni, a ti a. Swachh Bharat Mission-Gramin hnuaia hmalakna lian tak pawh plastic buaipui chungchang a ni tawh a. Vawiina hawn tak plastic hnawl sawngbawlna hian faina kawngah rah tha a chhuah ngei ka beisei, a ti.

Plastic hnawl sawngbawlnaah hian a sawngbawl tur lakkhawm kawngah tanlak a tul tur thu sawiin, Champhai chu thianghlimna kawngah Mizorama a hmahruaitu a ni thin a, tuna plastic sawngbawlna hawn thar takah pawh Mizoram hmun dang tan entawntlak ni tura Department, mipui leh khawtlangte chu tan la turin a sawm a. Bawlhhlawhte hi hralh suma chantir a, hlawkna siam thei tura hmasawn zel tum a nih thu a sawi tel bawk.

Plastic waste resource management centre-ah hian plastic tawnkhawmna (bailing machine) leh a herna khawl (plastic shredding machine) te dah a ni a. Plastic bawlhhlawh lakkhawmte chu sawngbawl a ni ang a, Guwahati-ah hralh leh tura ruahman niin hemi atan hian Dalmia Cement Company chu thawhpui an ni a. Anni hian thutthleng leh a dang siamna atan heng plastic chhiate hi an lo hmang leh thin a ni.

Plastic chhia sawngbawlna hi Swachh Bharat Mission hnuaiah RD Block tina bun tura ruahman niin tunah hian Mizoram pumah hmun 9-ah an bun fel tawh.

Nitin khawsaknaah plastic hian awlsamna nasa tak a thlen rualin kan chenna khawvel boruak leh leilung tichhetu ber pakhat a ni ta tlat mai a. Hetiang hi a nih avangin Swachh Bharat Mission - Gramin hnuaiah plastic buaipui chungchang hmalakna lian tak kalpui chhoh mek niin, plastic hman duh tawh loh hman leh theih tura ruahmanna chu SBM-G kaltlangin Champhai District tan pawh PHE Department chuan hma nasa takin a la mek zel a ni.

Champhai District-a a hmasa ber atan SBM-G, Champhai District chuan Plastic Press Bailing Machine chu PHED Complex, New Champhai-ah a bun a, helai hmunah hian thingtlang khaw hrang hranga plastic hman hnu lakkhawmte chu bail/tawnkhawm hnua recycle centre-a thawn chhuah leh turin  ruahmanna kalpui mek zel a ni. Plastic hman hnu bail/tawnkhawm theih loh, a sakhat chi angte her nawina tur Plastic Shredding Machine pawh PHE Department hotute hmalaknain helai hmunah vek hian bun nghal a ni bawk.

Khawl dahna Bailing Machine House & Store Room hi kum 2020-2021 chhung khan siam niin, Sq. m 46.82 a zau a ni a. Hydraulic Bailing Press Machine hi May ni 20, 2022 khan hman theih tura tihfel a ni a, hemi atan hian 3.7 kW (Kilowatt) transformer bun a ni a. Plastic Shredding Machine pawh hi May ni 20, 2022 khan hman theih tura peihfel niin, hemi atan hian 7.5 kW (Kilowatt) transformer bun a ni bawk.

Plastic Waste Resource Management  Centre (PRMC) hawnna hun PHED Complex, New Champhaia neih hi Er. C. Lalhmachhuana, SE, PHED, Champhai WATSAN Circle chuan a kaihruai a. Er. C. Chawnghnuna, Director, PMU, JJM, PHED chuan project nihphung leh awmzia tlangpui a sawi a. Er. K. Zohmingliana, Project Manager, PMU, JJM, PHED pawhin thu a sawi a. Er. ZD. Dengthuama, EE & Member Secretary, SBM-G Champhai District-in lawmthu sawiin hun a khar a ni.