No.2389/2021-2022

Aizawl, 29th September, 2021 : Mizoram Sawrkarin Khelo India Scheme hnuaia Khelmual Phullem phahna tur Lungphum phumna hun chu vawiin khan MSSC Complex, Muallungthu h neih a ni a. Prof. F. Lalnunmawia, MLA, Aizawl South III bialtu leh Pu T.C. Pachhunga, Vice Chairman, Sports, Youth Affairs, ICT & Tourism Board te chuan khuallian niin he hun hi an hmanpui a ni.

Khuallian Prof. F. Lalnunmawia chuan thalai infiamna lama tui mite tuihalna phuhru tura Chief Minister Pu Zoramthanga kaihhruaina hnuaia Sports Minister Pu Robert Romawia Royte leh Sports, Youth Affairs, ICT & Tourism Development Board hmalakna fakawm tiin hmun hrang hranga infiamna ruhrel tha din chhoh mek a ni chu a ropuiin a lawmawm hle, a ti a. A bial chhungah ngei phullem phah a ni tur chu Bialtu MLA a nih angin lawmthu a sawi a ni.

Aizawl S-III MLA chuan, "Vawiina lung kan phum hi Central Sawrkar in 'Khelo India Scheme' sum atanga Sports Infrastructure siamna tur atana a sanction a ni a, thil dang atana hman theih a ni lo a, hrileng dona leh hmasawnna hna thawhna tur chu a hrangin a kal a ni. Chutihrualin heng Project kan hmuh atang hian Mizoram Sorkarah Chhiah -GST leh Labour Cess thahnem tak a lut a ni" a ti a. "Kan sorkar hian Covid-19 do chungin a theihna zawnah theihtawpin hna a thawk zel a ni" Prof. F. Lalnunmawia chuan a ti bawk.

Pu T.C. Pachhunga pawhin Chief Minister leh Sports Minister te kaihhruainaa Mizoram hmun hrang hrangah khelmual leh infiamna ruhrel - sports infrastructure engemaw zat siam tawh leh siam mek chu a lawmawm takzet tih a sawi a. Sports infrastructure siamna atana Central sum kan hmuh te hian Mizoram sum dinhmun a ti tha sawt zel a, chu chu mipui tan malsawmna thlentu tangkai tak a ni thei a ni, a ti. Sports Minister leh sawrkar hmalaknain Sports Policy tha tak Mizoramin a nei tawh a, Football leh Sports discipline hrang hrang hmanga eizawnna hmu mi thahnem tak an awm tawh a ni, a ti bawk.

Mizoram State Sports Council Complex, Muallungthu hmuna Synthetic Football Turf siamna tur atan Khelo India Scheme, Ministry of Youth Affairs & Sports, Government of India chuan cheng nuai 500 a pawmpui tawh a, he hna thawk tur hian Décor India, Guwahati te thlan niin, Work Order pawh pek an ni tawh a ni.

Programme hi Pu H. Lalengmawia, IAS, Commissioner & Secretary, Sports & Youth Services, Govt. of Mizoram in a kaihruai a. Pu James Lalramnghaka, AE, MSSC chuan Technical Report pein, Pu H. Laldinsanga, SPO, MSSC chuan programme kharna hun a hmang a ni.