511/2025-2026

Saitual, the 21st May, 2025: Vawiin khan Phullen Rural Development Block Office hmalaknain Phullen block huam chhunga khaw pali- Daido, NE. Tlangnuam, Khawlian leh Phuaibuang khuaah te mipui ten an kawtkaia Sawrkar Pisa an dawr theihna turin Pu J. Lalhmahruaia, Phullen Block Development Officer (BDO) leh a thawhpuite chuan a hmunah kal chilhin ‘Doorstep Delivery of Government services programme’ hlawhtling tak an hmang a ni.  

He hunah hian Pu J. Lalhmahruaia, BDO chuan thusawiin, Sawrkar chu mipuite ta a ni tih mipuiten an hriat a pawimawh tih a sawi a. BDO chuan mi tam tak tan BDO Office dawr tura a hmuna kal a hautak ṭhin avangin mipuite ban phakah sawrkara thawktute chu an kawtkaiah an rawn inchhawp hnai a ni, a ti a, mipuite chu a ṭangkai thei ang bera hmang turin duhsakna a hlan nghal bawk a ni. 

Phullen BDO chuan BDO office kaltlanga hmasawnna hnathawh hrang hrang an hriatchian duh te leh an harsatna te chu thawktute hnenah zawt hreh lo turin a chah a, he programme hi mipui ten hlawk taka an hman chuan he service hi a hlawhtling tihna a ni, a ti.  

He hun hmannaah hian BDO Office aṭangin staff 27 an tel a, khaw tina Village Council ten BDO leh a thawhpuite hi ṭha taka lo dawngsawngin, chhimtu mipui pawh an ṭhahnem hle a ni. Vawiinah vek hian MGNREGA hnuaia VEC hnathawh hrang hrangte a ṭhat tawk leh tawk loh enfiah nghal a ni. He programme hi Phullen RD block huam chhunga khaw dangah te  pawh a tah tawla hman chhoh zel tum a ni.