Phullen khua-in Zu tel lova kum 25 chhung an lo kalpui tawh Dry Village Silver Jubilee Celebration chu lawmin vawiin khan Chief Minister Pu Lal Thanhawla’n a hmanpui.

Chief Minister chuan zu tel lova nun zalenna kum 25 chhung Phullen khua-in in hmang thei hi ka lawmpui che u a, khaw tangrual in nih zia a tilang ani a ti a. A lawmnaa tel tura duhsak taka an sawmnaah lawmthu a sawi a ni. Chief Minister chuan zu tel lova nun zalen leh nuam taka khawsakna Phullen mipuiin an khua an siam theihnaah chu duhtawk mai lovin zu aia nun suat tam zawktu leh hrisellohna tamtak thlentu vaihlo hi do tel se a duh thu a sawi a. Vaihlo laka fihlim khua ni tura tan la thar turin a chah a ni.

Chief Minister chuan mizote hian insiamthatna tur kan ngah hle a ni a ti a. Sum ngainatna khurah kan tlu lut em tih kan inenfiah a, sum ngainatna chuan duhamna te, hlemhletna te leh kut tling lova sum hmuh tumna te a hrin avangin a chhe lai siamthatu nih theuh kan tum tur a ni a ti. Mizote hi intodelh lo tak kan ni a, mahni eikhawp thla hnih chhung daih pawh kan thawkchhuak lova, chuvangin, kan intodelh theihna turin mi rethei ber thlengin lei rem kan rah theihna turin NLUP hi sorkar chuan a hmang a. A hlawhtlinna chu mitin kutah awmin rinawmna, dikna, taimakna leh Pathian tihna nei chungin kan kal chhoh a ngai a ni a ti.

Khual zahawm Excise Minister Pu J.H. Rothuama chuan Phullen khaw mipuite chu NLUP tihlawhtlingtu khua an nih ngei a beisei thu a sawi a. He Silver Jubilee lawmna hriatrengna Souvenir a tlangzarh a. Excise Department-in lawmpuina Rs.20,000/- a hlan bawk a ni.

Chief Minister nupui Pi Lal Riliani chuan lawmpuina thuziak mawi tak Joint Prohibition Committee (JPC) Chairman Pu C.Ramzauva hnenah a hlan bawk.

Phullen khua hian June ni 1, 1987 atang khan Zu awmlohna khuaah an puang a, kum 25 a kal chhung hian NGO hrang hrangten Co-ordination Committee siamin JPC kutah zu awmloh anih theih nan hma latu-ah a hmang a, JPC te hian an khuaa zu in leh la lut an hriatchian te chu action la nghal zelin Rs.500/- an chawi tir thin a. Hetah hian thliar bik nei ngai lovin sorkar hnathawk officer-te pawh an man tawh thin thu Celebration Committee Vice-Chairman Pu R.Lalthantluanga chuan a sawi a. An khaw bik mi an man te chu pawisa bakah kohhranah phuarin infiammi an nih chuan thla thum chhung infiam thei lo tura hren an nih thin thu a sawi bawk a ni.

Lawmna inkhawm hi bialtu MLA Pu Chawngtinthanga, Parliamentary Secretary-in a kaihruai a ni, PWD hotute an tel bawk a ni. He hunah hian khaw nawtin ruai nen an lawm a ni.