Vawiin khan Parish hall venglai, Kolasib ah ka chhung cancer vei leh veiloh enfiah/endik na (Screening Device) khawl 'Low Cost Illuminated magnifying Device for pre cancer and early cancerous lesions of oral Cavity' chu Pu Lal Riliani, President, Indian Society on Tobacco and Health, Mizoram chuan a hawng.

He hunah hian Kolasib A/C Bialtu MLA, MIFCO Chairman ni bawk Pu PC Zoram Sangliana chuan thu sawiin mimal leh chhungkaw tana tangkaina nei hauhlo harsatna, buaina leh thihna thlentu vaihlo,zuk leh hmuam chu kan khawtlang ti hmel bal tu ani tiin kan thlah a hun tawh takzet ani a ti. Bialtu MLA chuan natna leh thihna thlentu zuk leh hmuama sum sen thlawn ai chuan mahni fa te zirna bakah mi harsa zawk leh missionary te tanpui nan sum thehchhuak uar zawk ila kan mizo khawtlang nun hian hma a sawn zawk tur thu a sawi bawk. Kolasib District ina hriselna ngai pawimawh tak Bawrhsap, Daktawr ni bawk Dr. Arun T an nei chu vanneih thlak a tih thu sawiin a ngaituahna leh thahnem ngaihna te chuan Kolasib District Mipui tan hriselna leh kawng hrang hrangah hmasawnna a thlenpui ngei a beisei thu a sawi bawk.

Pi Lal Riliani, President, Indian Society on Tobacco and Health, Mizoram pawhin thu a sawi a, Pi Lal Riliani chuan Hnam rimchhia leh Hnam hrisel loa min siamtu Mizo nunna tamtak suattu vaihlo chu mihring hmelma ani tih kan pawm a hun tawh takzet ani a ti a , vaihlo tur hnathawh chu vawi lehkhatah langlo mahse kum tam a ral hnuah pawh a nghawng thalo chu a lang chho zela, vaihlo tur chu a thi ve mai mai loa, mihring nunna suattu langsar ber pawl ani chho mek a ni a ti. Hemi bakah hian Meizial leh vaihlo dangte chu mahni tan chauh nilo inchhung khura kan chenpui te bakah midang tana harsatna leh hrisel lohna thlentu a ni chho mek zel a hemi avang hian khawtlang leh chhungkaw tana hnawksak ni chho mek leh ringtu nun nena inhmeh lo tak zuk leh hmuam chu kan hnualsuat ngam a hun tawh takzet ani a ti.  In entir ngun a pawimawh thu sawiin Cancer leh natna dangte pawh hma taka hmuchhuah chuan inenkawl pawh a awlsamin enkawl damna chance pawh a sang ani ati bawk. Hetianga ka chhung cancer vei leh veiloh endikna khawl hawn theiha a awm chu  lawmawm a tih thu sawiin Mizorama District dangah te pawh a awm thuai a beisei thu sawiin in entir/ checkup chu thlahthlam hauh lova  natna hrang hrang ina kan taksa a khawih chhiat tam hma a mithiamte rawn fo turin kalkhawm mipuite a chah bawk ani.

He hunah hian Dr.Martin Chawngsailova State Programme Co-Ordinator, NCD Control Programme, Dr. C.Vanlalhlimpuia, District Nodal Officer, District Tobacco Control Cell, Kolasib District leh Dr. F. Lalrinmawii, Dental Surgeon te chuan kalkhawm mipuite hnenah zuk leh hmuam vaihlo ina cancer chi hrang hrang a thlen theih dan, mihring taksa a vaihlo tur ina nghawng a neih dan te, meizial khu ina mahni chauh nilo midang a nghawng dan te, nun dan hrisel tawk loh avanga taksa ina natna chi hrang hrang a do let theiloh dan te chungchangah zirtirna an pe a. Heng Daktawr te thusawi atanga a lan dan chuan Vaihlo ina Cancer a thlen tam ber chu chawkawng, chuap leh Hrawk Cancer a ni a, India rama Cancer natna vei zawng zawng za a 40 (40%) chu hrawk bawr leh ka chhung cancer (Oral Cancer) anih thu tarlan bawk ani, Oral Cancer natna thletu za a sawmkua (90%) chu vaihlo zuk leh hmuam vang anih thu tarlan bawk ani. Hemi bakah hian Mizo mipuite ina thla khata vaihlo zuk leh hmuama kan sum sen ral chu cheng nuai 1827.84 a nih thu tarlan bawk ani.

Ka chhung Cancer endikna khawl (Screening Device) hi Dr. Siddhartha Ram Pujari, MDS (Conservative Dentistry & Endodontics), Delhi chuan a hman dan leh a hnathawh dan chungchangah te zirtirna a pe a, Re-Agents te hmangin ka chhunga cancer natna cell awm leh awmloh (pre cancer and early cancerous lesions of Oral Cavity) chu a enchhin theih dawn a, mi pakhat en  nan minute 2 vel hun a duh dawna, ken kual awlsam tak (highly portable)  niin current awmloh pawhin Battery hmangin hna a thawk thei a ni.

Khawl hi Pilot basis  a Kolasib District Hospital ah hawn (launch) a ni a, a hlawhtlin leh hman tangkai dana zirin Kolasib District chhunga PHC hrang hrangah hawn belh zel tum a ni. He hunah hian insawiselna nei mi 2 te chu he khawl thar hmang hian an ka chhung endiksak nghal an ni.

He hunah hian Kolasib Khawpui chhunga Sawrkar hnathawk hrang hrang bakah Village Council Hotute, Sub Hqrs YMA , Sub Hqrs MHIP, Sub Hqrs MUP hruatute, Chanchinbu mite leh mipui thahnem tak an kalkhawm a ni.