Mizoram sawrkar flagship programme New Land Use Policy (NLUP) hlawhtlinna hrang hrangte phochhuahna leh tarlanna hun NLUP Kutpui (Fair-cum- Exibition-2018) chu vawiin khan ni hnih awh turin Convention Center Basement-ah neih tan a ni. NLUP Kutpui hawnna programme hi vawiin chawhma khan Convention Center Auditorium ah neih a ni a. Pu P.L Thanga IAS (Rtd), Member Secretary Mizoram State Planning Board leh Vice Chairman, NLUP Implementing Board ni bawk chuan khuallian niin he Kutpui hi a hawng a. Pu James Lalrinchhana Secretary, NLUP Implementing Board (NIB) chu khualzahawm a ni. 

Khuallian Pu PL Thanga IAS (Rtd) chuan thusawiin NLUP avang hian Mizoram Economy in hma nasa takin a sawn phah bakah tun dinhmunah Per capita Income pawh nasa takin a sang a, Kum 5 chhung hian NLUP avang hian India hmarchhak ah Mizoram chu Gross State Domestic Project (GSDP) thang chak ber kan ni mek tih a sawi. NLUP avang hian Sorkar laipui atangin RKVY a State sorkar in sum tlem te dawng thin pawh a let a tihpun anih thu a sawi bawk. UNO pawhin NLUP hmalakna chu tha a tihpuiin UNO document tinrengah NLUP hmalakna a chuan avangin khawvelin Mizoram an hriat phah a ni, a ti bawk. Pu PL Thanga chuan 'Land and water management in Mizoram' tih Project hmangin Japan International Cooperation Agency (JICA) chuan, kuthnathawktute chawikang turin Rs 1229.90 Lakhs hmangin hmalakna a kalpui dawn tih a tarlang bawk. Minnesota University mithiamte hmangin, 'Pa' eichi leh chi loh zir chianna kalpui theih a ni ta. Hei mai bakah hian NLUP in a tum Ram leilung hman dan turah hun lo la kalzel turah kan tu leh fate chhawr tangkai theih dan tur ngaihtuahsak a, kuthnathawktute eizawnna ngelnghet ngaihtuahsak bakah Ramngaw chereu mekte humhalh a, Tuihna tha siam a, khawtinin tui hnianghnar an neih theih nana hmalak a nih thu a sawi a. Sawrkarin a mawhphurhna a ti a, a tihlawhtling tu tur chu a dawngtute an ni ati. Kuthnathawktute thawhrah phochhuahna NLUP Kutpui chu kuthnathawh zahpui lova, infuihna leh chochhuah ni turin a duh thu a tarlang bawk. 

Khualzahawm Pu James Lalrinchhana, Secretary NLUP Implementing Board chuan Chief Minister kaihhruaina in NLUP Kutpui Aizawlah leh District hrang hrang a hman  nih thu sawiin NLUP hmangin ei leh bar a kan intodelh theihnan sawrkarin scheme hrang hrang a duang a, heng scheme hmanga kan thawhrimna rah phochhuahna hun kan hmang hi hmasawnna tha tak a ni, a ti. NLUP line Department sawm (10) te kaltlangin Mau, Thing leh Ramsate hnenah chanchintha hriltu kan ni a, kan mawhphurhna leh kan chanvo te hre reng a, taihmakna leh rinawmna nena NLUP tihlawhtling theuh turin kalkhawmte a chah. 

Vawiin NLUP Kutpui hawnna hun hi Lunglei District Bawrhsap Dr Ankita Chakravarty, IAS chuan a kaihruai a. Kalkhawmte lawmna thu sawiin District Bawrhsap chuan NLUP chu kan ram intodelhna tur hmanraw pawimawh tak, mi harsa leh rethei ten eizawnna bul an tan theihna tura hmalakna pawimawh tak a ni, a ti. NLUP Line department hrang hrangte hmalaknain Lunglei District chhungah hmasawnna  tam tak hmuhtheih in a awm a ni, a ti NLUP Kutpui ti hlawhtling tura hun leh tha nasa tak seng tu District official te chungah lawmthu sawiin an thawhriman leh inpekna chu fakawm a tih thu a tarlang bawk. 

NLUP Kutpui pual hian Lunglei Horticulture Division chuan NLUP 3th leh 4th phase last to final instalment,  Lakhuihthei, Serthlum bakah NLUP/NEDP Convergence 2016 - 2017 final instalment Lakhuihthei, Thingpui, Serthlum leh Zikhlum thlangtu chhungkua 975 te hnenah Rs 147,11,500 sem a ni. Agriculture Department Lunglei pawhin NLUP WRC -I,II Oilpalm leh Sugarcane thlangtu chhungkua 1246 te hnenah Rs 223.56 Lakhs NLUP an sem bawk. 

NLUP Kutpui, Lunglei District ah hian  Line Department ten Stall 20 buatsaihin NLUP hlawhtlinna atanga tharchhuah Sangha, coconut, dry chilly, pickle, thingpuife, handloom and handicraft, tailoring leh blacksmith product, artui, hmunphiah, silk, buhfai, kurtai, sial sa leh thil dangte 20% discount a zawrh a ni. Hemi bakah hian Health Department buatsaih Free Clinic neih a ni bawk. NLUP Kutpui hian hlut a hlawhin tlawhtu pawh an thahnem hle a ni.