Nimin 16th May 2018 atang khan ni hnih awh Southern Range Crime leh Law & Order Review Meeting chu SP Conference Hall, Lungleiah neih a ni. He meeting-ah hian Southern Range hnuaia District pathum – Lunglei, Lawngtlai leh Siaha SP leh CO 2nd Bn MAP te leh SDPO te an tel.

Southern Range Crime leh Law & Order Review Meeting hi Pu Neihchungnunga IPS, DIG (SR) chuan Inaugural Address neiin a hawng a, officer kalkhawmte lawmna leh fuihna thuchah sawiin heng District pathuma police dinhmun, crime awmdan leh dan leh thupek dinhmun te thlirho a ni. SP Lunglei, Siaha, Lawngtlai leh CO 2nd Bn MAP Lunglei ten Powerpoint presentation hmangin anmahni unit theuh dinhmun leh an hmalakna te an sawiho.

Crime Meeting ni hnihna ah hian Pu Balaji Srivastava IPS, DGP hovin meeting neih chhunzawm niin Crime dinhmun leh law and order dinhmunte thlirho a ni a, hmalak zel dan tur te sawiho a ni bawk.

Nikum 2017 January atanga April hun chhung khan Southern Range hnuaiah Case 144 ziahluh a ni. Kumin 2018 January atanga April chhung hian case 186 ziahluh a ni thung. Nikum aia kumina case ziahluh tamna chu za zelah 29.26 niin rukruk, tharum thawhna leh inchhungkhura tihbuaina case te a punga, chutih lai chuan pawngsual, hmeichhe zahawmna tihbawrhban leh kum tlinglo chunga hleihlenna lamah chuan case a tlahniam thung. Police ten crime prevention lama theihtawp an chhuah chung pawha crime rate alo pung hian police ten sual do kawngah ngawrh lehzuala tan lak a ngaihzia a ti lang tih meeting ah hian sawiho a ni.

A tlangpui thuin Chhimbial (Southern Range) huam chhunga District pathumte ah hian dan leh thupek kenkawhna a tha tawka kum 2018 chhung hian dan leh thupek kenkawhna kawngah harsatna liantham a awmlo a ni. Tunhnaia Myanmar sipai leh Arakan Army te inkahna avanga Myanmar ral tlan avang te, Lawngtlai District Land Owners Association ten KMMTTP hnathawk an dante, Lawngtlai DC Dr Arun T, IAS transfer duhlohna te, Lunglei Thalai Pawlin kawng tha duh vanga PWD hmalakna an duh khawp loh vanga an hmalakna te avang hian dan leh thupek kenkawh kawngah harsatna chu awm mahse, police te inpekna leh a hun taka chet an lakna avangin buaina liantham awm lovin tha taka dan leh thupek kenkawh a ni. Tun hnaia CADC inthlan pawh tluang taka zawh a ni bawk. District SP-te leh CO 2nd Bn MAP-te chu an Distrit theuhah Police Station leh thingtlang khua te tlawh tam tur leh mipuite nena thawhhona tha siam turin DGP chuan a chah a ni.