Vawiin tlai khan PWD Minister Pu Lal Thanzara chuan  Saron Road, Chanmari Veng-ah hawnna hun neiin, khuallian a ni.

Khuallian Pu Lal Thanzara chuan kawng thar lo awm tura hma latu Saron Road Committee leh Saron Road a tlangna tura mimal inphal tak tak te hnenah lawmthu a sawi a. Saron Road Committee inpekna a zara kawng thar lo awm hi an tumruhna vang a ni, a ti a. In tamtak kawt kaiah lirthei kal theia a lo awm hi hmasawnna tha tak niin, chakkhai laknan te pawh a tangkai hle a beisei a. Kawng thar awm hian ram hlutna a ti sang a, a chengte tan pawn chhen fakawm niin, kawng tinrengah a chhawr tute kan ni tih hi kan hre chho zel niin a hriat a, a lawmawm hle a ni, tiin a sawi a ni.

Saron Road hi kum 2014, April thla atang khan siam hna thawh tan a ni a, Chanmari West kawngpui chunga chengte, Chanmari leh Chanmari West mipui te’n chakkhai an lamna tur, damloh leh thihna hial an lo tawh a motor hmanga inkalpawhna tur a tana siam a ni. Chhiatrupna a lo thlen palh pawh a, lo inbuatsaihna a tana ruahman a ni. Saron Road hi metre 240 a sei a ni a, a zau zawng hi Pick Up Motor leng a ni a, Chanmari West Presbyterian Biak In chhak atanga intanin, Chanmari West leh Chanmari ah kal zelin, Mc Donald Hill tlang pangper-ah a tawp a, la chhunzawm zel a nih chuan Vaivakawn emaw Dawrpui Vengthar thleng kawng hian a pawh thei a ni.

Kawng siam nan hian PWD atangin Rs.42,37,632; Social Welfare Department atangin Rs.34,62,500; UD&PA atangin Rs.12,41,000 leh Mimal hnen atangin Rs.1,18,015 hmuh a ni. A vaia sen zat hi Rs. 91,18,013 a ni. He kawng siamnan hian Saron Road Committee chuan hmanrua, tui, electric leh mamawh dangte chu a chhehvela mite ta  a hmansak a, kawng hi laih a ni lo va, cubic lung hmanga rem zawl hnuah, a chungah RCC chhuat chhah taka phah leh dawh chhuah vek a ni.