Ministry of Housing & Urban Affairs, Govt. of India chuan Swachh Bharat Mission (Urban) hnuaia kum tina faina kawnga India ram khawpui (cities and urban towns)-te inelna Swachh Survekshan a buatsaihah Mizorama Biate khua chuan Best City in 'Innovation & Best Practices' – NE ZoneAward a la a ni.
Swachh Bharat Mission (Urban) hnuaia kum tina neih thin Swachh Survekshan-ah hian kumin 2018 hian khawpui 4203 zet an inel a, Swachh Survekshan 2018 result hi 16th May, 2018 khan Pu Hardeep Singh Puri, Union Minister for Housing & Urban Affairs chuan a puang a ni. Swachh Survekshan intihsiakna lawmman chi hrang hrang category 52 puan chhuah a ni a, category pakhatah Biate khua hi a tel pha a ni.
UD&PA Minister Pu Zodintluanga chuan India ram pum huap khawpui 4303 zet inelnaah Mizoram urban town 23 zinga pakhat Biate a lo lang ve hi hmasawnna ropui tak a ni, a ti. Minister chuan Central lam atangin khawfai endiktute lo kalin, tehfung mumal tak duan sa nen an teh hnuah lawmman dawng tlaka Biate an thlang hi a lawmawm em em a, Biate hi Mizoram chhunga urban area te faina kawnga inelna kum kaltaa neihah khan khawfai ber lawmman an lo dawng tawh a ni, a ti.
UD&PA Secretary Dr C Vanlalramsanga pawhin Biate-in India ram pum intihsiaknaa lawmman a dawng chu lawmpuiin Mizoram chu India rama State fai berte zinga mi a nih theih thu leh chumi atan chuan Sorkarin mipui thlawpna a mamawh thu a sawi a. Mizoram chu hmar chhak State te zingah chuan a titha pawl tak ani chho ve reng a, kan têtna te hi remchangah kan hman thiam chuan India ramah faina kawnga hmahruaitu kan ni thei a ni, a ti.
Kum 2018 Swachh Survekshan Competition buatsaihah khawpui 4203 zet inelna-ah hian nikuma pakhatna lo ni tawh Indore chu a pumpuiah pakhatna a ni a, Bhopal-in a dawt a, Chandigarh chu pathumna a ni.
