Vawiin hian E. Lungdar Thangburha Hall ah National Bank for Agriculture & Rural Development (NABARD) leh Northeast Innitiative Development Agency  (NEIDA) a unit of TATA Trusts tangkawpten an kalpui, Tribal Development Project E. Lungdar Block chhung khaw pali a kum ruk chhung kalpui tur project chu Pi. Vanlalawmpuii Chawngthu, Minister of State leh bialtu MLA ni bawk chuan a hawng.

A hawnna inkhawm, Pi Dorothy Muansangi, MCS, BDO kaihhruaiah Pi Vanlalawmpuii Chawngthu chuan NABARD leh NEIDA ten an Project thawh nana a bial chhung E. Lungdar Block an thlang chu lawmthu a sawi a. An hmalakna dawngtu an pun zel theih nan a dawng hmasatu ten hlawhtling takin lo kalpui ngei thei se a tangkai a rin thu a sawi a ni. Minister chuan heng kan thil dawnte hi a nihna tur ang taka hmanga, kan tan, kan chhungkua leh kan ram tan a tangkai ani tih hre chunga theihtawp kan chhuah loh chuan he project thil tum hi kan thelh ang a hlauhawm thu sawiin a hlutzia leh kan vanneih bik zia hre chungin theihtawp lo chhuah turin ka ngen tak zet che u ani, tiin a dawngtu kal khawm te a chah a ni. Pi Vanlalawmpuii Chawngthu hian heng khaw pali VC te hnenah hian hlothlawhna khawl pali theuh leh Sprayer pali theuh - beneficiary te inhmantawm tur a hlan nghal a. Serthlum tiak 20000 leh Thingfanghma tiak 20000 heng khaw paliah hian NEIDA hian an sem chhunzawm nghal bawk dawn ani.

He huna khualzahawm Pu R K Srivastava, General Manager, NABARD pawhin thu sawiin India ram chhunga NABARD in thingtlang mite hmasawnna hna a thawh tlangpuite a tarlang a. Mizoram sawrkar nena an thawh dun dante, Mizorama KVK te leh ICAR Kolasib nena drip irrigation leh thlai chi tha zawk a awm theih nana an thawh ho dan te leh Cordnerc te nena Thenzawl puan tahtute tana an thawh ho dan te sawiin, theihtawp chhuaha Mizoram tana thawh zel an inhuam thute a sawi ani.

He hunah hian Pu B. Lalrinkima, State Programme Coordinator, NEIDA chuan an hmalak dan tlangpui report a pe a. Tribal Development Project hi Lunglei Block lamah Project 1 leh 2 kalpui a nih tawh thu sawiin, E. Lungdar Block chu Project 3 a nih thu a sawi a. Block chhunga khaw pali E. Lungdar, N. Mualcheng, N. Vanlaiphai leh Khawlailungte thlan phawt an nih thu sawiin heng khuaa loneitu thlante chu Serthlum leh Thingfanghma chi peka bul tanin, E. Lungdar ah Ar vulh a tel bawk ang a; an hmalakna te vil zui reng turin Field Facilitator an dah zui bawk ang. Chutiang zelin kum ruk chhungin loneitute hnenah thlai chi pein a enkawl zuina lamah an tanpui thin dawn a, a kum khatnaah hian E. Lungdarah mi 54, Mualchengah 28, N. Vanlaiphaiah 50 leh Khawlailungah chhungkaw 60 te hmalak pui an ni ang. Tin, heng khuate hi Custom Hiring Centre siam sakin chutah chuan loneituten an huan thlawhfai nana an hman tur khawl chi hrang hrang an dah sak nghal a ni. Tin, heng khuateah hian an hmalakna bul tan nan (entry point activity ah) vantlang tui dahkawlna tha tak an siam sak vek a, a Project kalpui nan hian Rs. 2.5 crore ruahman a ni. Pu B. Lalrinkima hian, Mizoram sawrkar in TATA Trusts hmalakna hrang hrangte tha tak leh phur taka a lo dawnsawn thin avangin NEIDA hmalakna a zau tial tial tih sawiin kan thawh that phawt chuan a la lianin a la zau tial tiala a rin thu a sawi a. Project 4 pawh Serchhip Block ah kalpui thuai a nih tur thu a sawi bawk ani.

He hunah hian VR NAG, DGM NABARD te, NEIDA thawktute, E. Lungdar khawtlang hruaitute leh heng khaw thlan bik palia beneficiary te, Village Council te an kalkhawm a. Heng an hmanraw sem te pawh hi Village Council te kutah hian hlan a ni.