Pi pu zai (tlar thum zai) thluka Pathian Fakna hla inphuahsiak lawmman sem programme Art and Culture Department buatsaih chu vawiin khan Vanapa Hall, Aizawlah neih a ni a. Art and Culture Minister Pu R.Lalzirliana chu khuallian a ni.

Pu R.Lalzirliana chuan pi pu zai thluka Pathian fakna hla inphuahsiak, a vawikhatna atana Mizorama buatsaih a ni chu lawmawm a tih thu sawiin hla 153 zet thehluh a ni hi kan hnam ziarang kan ngaihhlutzia tilangtu a ni, a ti a. Mizo rilrem zawng tak, sak leh lampui nuam em em pi pu zai thluka Pathian fakna hla phuah tharte hi biak inah lak luh ni a la awm ang a, a la hlu hle dawn a ni, a ti. Khawvel hmasawnna chak taka a kal mek laiin pi pute nunhlui leh an zia atanga a tha laite laa, vawng nung zel hnam tam tak an awm tih sawiin kan hnam ziarang leh tawngte a bo loh nana vawnhim leh chawisan hi kan mawhphurhna a ni, Art & Culture Minister chuan a ti.

Pi pu zai (tlar thum zai) thluka Pathian Fakna hla inphuahsiak neih a nih tur thu (advertisement) hi August ni 29, 2019 a tihchhuah tan a ni a. Mi pakhatin hla pakhat zel thehluh tur niin October ni 18, 2019 thleng khan hun hawn a ni. Hla thehluttu hi mi 153, mipa 119 leh hmeichhia 44 an ni a. Aizawl khaw pawn atangin mi 51 an tel. Zaithluk chi nga Domangi Zai, Laldanga Awi Awi, Hrangchhawni Zai, Suakpuivungi Ruah Varpui Bangtheh leh Darmani Zai hmangin hla inphuahsiak hi buatsaih a ni a. Domangi Zai thluk hla 36, Hrangchhawni Zai thluk hla 22, Laldanga Awi Awi thluk hla 51, Suakpuivungi Ruah Varpui Bangtheh thluk hla 17 leh Darmani Zai thluk hla 26 a lut a ni.

Vawiin lawmman sem programme-ah hian a titha sawm thlan chhuahte an intihsiak a. Lawmman pakhatna dawngtu chu L.T Hauhnar, Chhiahtlang Hmarveng a ni a. Pahnihna dawngtu chu R.Lalrochhara, Keifang niin pathumna lawmman latu chu RC Kungpuii, Armed Veng a ni. Consolation prize hi mi pasarih - Thansanga Chawngthu, Nunsangzela Chhakchhuak, B.Lalkhuma, PC Zohmunliana, B.Lalthlengliana, K.Ngaizuala leh R.Vanlalvena ten an dawng bawk. Endiktute hi Dr.R.L.Thanmawia, Pu F.Vanlalchhuanga leh Pu K.Rosiama te an ni.

Programme hi Art and Culture Secretary Dr. Lalzirmawia Chhangte chuan a kaihruai a, Joint Director Pi Carol VLMS Dawngkimi’n intihsiak neih a nih dan leh an inbuatsaihna te a sawi a. Art and Culture Director Pu R.Hmingthanzuala’n lawmthu sawiin hun hnung a khar a ni.