Nimin khan District Level Steering Committee on Student Police Cadet (SPC) chu an Chairman, Lunglei District Bawrhsap ni bawk Pi K.Lalrinzuali hovin a Pisa ah an thu khawm.

Lunglei DC Pi K.Lalrinzuali chuan Student Police Cadet (SPC) Programme chu sawrkar laipui hmalakna pawimawh tak a nih thu sawiin zirlai naupangte khua leh tui tha ni tura chherchhuah leh sualna hrang hrang dona kawnga mi tangkai an nih theih na tura inkaihhruaina tha tak a ni, a ti.

Meeting-ah hian Student Police Cadet (SPC) Programme kal mek chu thlirho niin hmalak tul leh hmachhawpte sawiho a ni a. Lunglei District atana SPC Nodal Officer Pu Lalchhuanthanga Additional SP Lunglei chuan SPC hi May thla atangin Government Higher Secondary School ah zirlai thlanchhuah 44-te tan kalpui mek a nih thu a sawi a. Heng Student Cadet te tan hian unform leh a kaihhnawih badge, scarf, pheikhawk etc ruahman mek a nih thu sawiin classroom a inzirtirna bakah practical training-te kalpui zel tum a nih thu a sawi. Lunglei leh a chhehvela Police leh sipai hmunpui te pawh tlawh tura ruahmanna siam mek a ni.

Student Police Cadet Programme hi sawrkar laipui Ministry of Home Affairs hmalakna-a India ram puma kalpui mek a ni a. He Student Police Cadet programme-in a tum ber chu zirlai naupangte khua leh tui tha ni tura chher chhuah leh sualna hrang hrang dona kawnga mi tangkai an nih theih nana zirtirna pek te a ni. SPC hi Kum 2010 khan Kerala sawrkar chuan sawrkar school 130 ah a kalpui tan a, 2011 khan All India Police Science Congress chuan state tinte chu he hmalakna hi zawm ve turin a sawm a. Chumi kal zelah chuan kum 2018, July Ni 21 khan Union Home Minister Pu Rajnath Singha’n “We learn to serve” tih  thupuia hmangin India ram puma hman turin a lo hawng zui ta a ni. Mizoramah  pawh State Level Steering Committee on SPC hi din ve nghal niin an hnuaiah  hian District Level Steering Committee on SPC din leh niin District  Magistrate chu Chairman a ni a, Superintendent of Police, Addl. SP leh SDEO te chu Committee member an ni. Student Police Cadet ah hian School pakhat zelah zirlai 44 an awm a ni.