Vawiin khan Information & Public Relations Department chuan an Secretary Pi Rosangpuii MSS Superannuation Pension a chhuak chu thlahna hun Director, I & PR Office ah an hmang.

I & PR Director Pu Jim K. Chozah bakah Jt. Director te – Pi Lalnithangi leh Pi Lalsiamliani ten thlahna thu sawiin he Department leh Mizoram tana Pi Rosangpuii’n tha a lo thawh tawhna zawng zawngah lawmthu an sawi a. Directorate leh Secretariat a thawk zawng zawngte tana thawhpui nuam leh tangkai, inpawh tlang leh hlawk tak si a thawk ho thin an nih thu leh hna thiam tak a nih dan te an sawi lang a. Superannuation pension a a chhuah a lo hun ta chu ui tak chungin duhsakna nen an thlah a ni.

Pi Rosangpuii pawhin I&PR Department te duhsakna hlanin thawhhopui nuam a tih thu leh he Department a chan chhunga amah an thlawpna zawng zawngah lawmthu a sawi a. Mizoram tana rinawm taka hna thawk chhunzawm zelturinduhsakna a hlan a ni.

Vawiin vek khan Art & Culture Department pawhin Pi Rosangpuii hi a office ah an thlah a. Hemi hun ah hian Secretariat leh Directorate lama Officers kim takin an kal a ni. Pi Rosangpuii hi Office thawhpui nuam tak mai leh Mizo nu tak mai, nelawm leh mi tanpui peih tak mai a ni a, a hnuaia thawkte hian an ui thu an sawi bawk.