Serchhip District bawrhsap Pi Juhi Mukherjee, IAS leh a pasal Serchhip District Superintendent of Police Pu Romil Baaniya, IPS te chu National Capital Territory of Delhi a transfer an nih avanga Serchhip District an chhuahsan dawn tak avangin anmahni thlahna inkhawm vawiin khan buatsaih a ni.

Serchhip bawrhsap thlahna inkhawm hi vawiin chawhnu dar 1:00 khan Serchhip DC Conference Hall-ah buatsaih a ni a, hetah hian Serchhip DC Office a thawkte bakah Serchhip a Sawrkar hnathawkte, tlawmngai pawl hrang hrnag hruaitu, Village Council aiawhte leh political party aiawhte an tel kim hle a ni.

Pi Juhi Mukherjee chuan inthlahna thu sawiin Mizoram Chief Minister Pu Lal Thanhawla chungah leh Chief Secretary kalchhuak ta Pi L.Tochhawng, IAS (Rtd) chungah abik taka a lawmthu sawi a, Serchhip DC hmasa pahnih Pu H Darzika leh Pu P.Lalchhuanga ten DC Office inrelbawlna felfai tak mai leh bungalow changtlung tak an hnutchhiah avanga lawmthu sawiin Serchhipa a awm chhunga harsatna a tawh loh thu te, sawrkar hnathawkte leh mipuite thawhpui nuam atih thu leh Mizoram Sawrkar chu hrawn nuam a tih thu te a sawi a, khawtlang hruaitute leh kohhran hruaitute, Serchhip District MJA te leh Serchhip District mipuite chungah lawmthu sawiin Serchhipa a awm chhunga an rilru a tihnatna a awm anih chuan ngaihdam a dil nghal bawk a ni. Bawrhsap chuan mizo culture leh tradition te a zah thu sawiin hnam hrang hrang “MIZO” tih hnuaia lungrual taka an awm te chu ropui a tih zia a sawi a, Serchhip chu a second home ang tak taka a ngaih thu leh Mizoram chu engtikah mah a theihnghilh loh tur thu te, Mizoram tana tih theih a nei anih phawt chuan eng tik lai pawha amah be pawp hreh lo tur a mipuite chah in an tan a in hawng reng ang tih a tiam a ni.

Pu V.L. Remliana , Addl DC kaihhruai Bawrhsap thlahna inkhawmah hian pawl hrang hrang leh department hrang hrangin thahna thilpek hlanin an ui thu an sawi a, sum leh paia pamham lo anih thu te an sawi a, Serchhipa thil pawimawh tih nikhua a pawisa hman bang awm thin te pawh paipawn mai lova mirethei leh harsa zawkte tanpuina atan a hmang thin chuan an rilru a hneh thu te, naupang ho a ngaihsak leh duhsak thin thu te, a inngaihtlawmna te leh thil dang tam tak a nuna entawn tur an hmuh te an sawichhuak a ni.

Serchhip District Superintendent of Police, Pu Romil Baaniya, IPS pawh vawiin chawhnu dar 2:00 khan Serchhip SP Conference Hall-ah a staff ten thlahna hun an buatsaih a thilpek chi hrang hrang an hlan a ni.

Pi Juhi Mukherjee hi 2007-batch IAS niin India ram pumah 10-na a ni a, Mizoramah November ni 1, 2012 khan a hna rawn zawmin Serchhip Bawrhsap hna hi November ni 8, 2012 atang khan a chelh tan a, a pasal Pu Romil Baaniya, IPS hian October ni 30, 2012 khan Mizoram ah a hna a rawn zawm thung a, an nupa hian an term an hman zawh hnu ah National Capital Territory of Delhi ah transfer an ni a, August ni 31, 2015 hian charge in hlan felin September ni 1, 2015 ah Delhi an pan ang.