Vawiin hian Pi Vanlalawmpuii Chawngthu, Minister of State, Mizoram chuan a bial chhung Bungtlanga Bungtlang Educational Service ten kumpuan hawnna leh inzirtirna hun an neih chu khuallian niin a hman pui.

He inkhawmah hian Pi Vanlalawmpuii Chawngthu chuan, ram changkang apiangin zirna an uarin an ngaihlua, a rah pawh an chhawr nasa thin, a ti a. Thiamna leh finna hi inchhuhsak theih loh rohlu a nih avangin mihring tan a pawimawh em em a ni, a ti. Khawvel chu a tling leh a thiam apiangte dinchhuahna a nih tawh avangin zirlaite kan tan a tul a, chhawrtlak mithiam nih ngei tuma kan inbuatsaih sauh sauh a pawimawh a ni tiin he huna zirlai kal khawmte hi a fuih a ni. Zirtirtu, mahni thawhna hmuna awm tha duhlo leh hnaa tuina neilote hi ram hmasawn zelna daltu pakhat an tling a, rawngbawlna pawimawh tak, mi dangte tanpuina remchang leh naktuka kan ram hmelhmang lo lang chhuak tur chhertute an nih avangin an tawhna hmun theuhah, tui leh phur taka an thawh reng theih a tul a ni, a ti.

He kumpuan hawnna inkhawm hi Pu C. Remsanga, President, Bungtlang Educational Service Association in a kaihruaia, kumpuan thupui hi “Zirna Uar Kum” tih niin; Pu Lawmawma, District Education Officer, Serchhip District leh Pu TC Lalremsiama, Youth Commission Officer te pawhin thusawina hun an hmang a ni.