Vawiin chawhnu hian Pi Vanlalawmpuii Chawngthu, Minister of State, Cooperation etc., chuan a bial chhung Khawlailung khuaa Fu chinga eizawngtu Association Assembly vawi hnihna, Khawlailung YMA Hall a neih chu khuallian niin a hman pui a. Pu James Lalsiamliana, DAO Serchhip chu khualzahawm a ni bawk.

He Assembly ah hian thusawiin khuallian chuan, Khawlailung khuaah chhungkaw engemawzat ten rim taka hnathawkin Fu an ching a, Kurtai tam tak tharchhuakin Khawlailung khua chu Kurtai hmangin an chawilar thei a. Hetiang khawpa thawkrim leh taima an nih avang hian an chhuanawm hle a ni, a ti a. Bialtu a nihna zawn atang pawhin a chhuang thin hle tih a hrilh  ani. Mi thenkhat hnathawh hi chu sawrkar atanga tanpuina dilna atan mai a ang thin a, chutiang mite chu an hlawhtling mawh khawp mai. Tanpuina beisei hauh lova theih tawp lo chhuah thin te ngei hi sawrkar tan pawh tanpui an chakawm em em zawk a, tanpui tlak chu sawrkar pawhin a zawng zel dawn a ni, tiin Kurtai chingtu kalkhawmte chu hlawhtlin zel tum tlat turin a fuih a ni.

Khualzahawm Pu James Lalsiamliana, DAO pawhin thusawiin Khawlailunga Fu chingtute tana sawrkar atanga hmalakna lo kalpui tawh thinte a sawi a. Fu chingtute chu an harsatna kawng hrang  hrangah tanpui turin Agriculture Department chu a inhawng hle tih hrilhin a tulna apiangah an tanpui thin tur thu a sawi a ni.

Khawlailung Sugarcane Grower Association Assembly vawi hnihna hi an Chairman Pu H. Malsawma’n a kaihruai a, tunah hian an pawl hi member 50 niin an Kurtai tharchhuah te hi a tamin an thawndarh nasa thin hle a. An hlawhtlin em avang hian Kurtai Kut te pawh an lo hmang hial tawh a ni.