Pi Vanlalawmpuii Chawngthu chuan tun hnaia E. Lungdar a kangmei tuar chhungkaw pathum te chu nimin khan a tlawh a, kang tuar chhungkaw pathum leh in neitu, an vaiin chhungkaw palite hnenah tanpuina Rs. 2000 theuh a hlan.

E. Lungdara ni 24.1.2018 tlai lama kangmei chhuakah hian Pu C. Mankima (L) leh Pu C. Lalruma (L) te in, chhungkaw pathumin an luahlai chu bungrua engmah chuh hman lovin a kang a, kangmei tuartute hi in neitute bekah a luahtute Pi Zomawii, Pu B. Lalnunmawia leh Pu Thangzamliana te an ni. Chhiat tawh thu hriat a nih veleh hian bialtu MLA leh Minister of State, Pi Vanlalawmpuii Chawngthu hian a tulna a pianga hman turin Rs. 10000 leh Rangva Bundle 12 a pe nghal a, Serchhip Bawrhsap Pi Sangchhin Chinzah leh E. Lungdar BDO Pu Vanlaltanpuia te pawhin Rs. 2000 ve ve an pe a, sawrkar atanga tanpuina awm thei ang chi pawh ngaihtuah sak an tum thu Pu Vanlaltanpuia hian a sawi bawk.

Heng kang tuartute hi nimin khan Pi Vanlalawmpuii hian tlawhin Rs. 2000 theuh tanpuina hi a hlan leh a ni.

Heng bakah hian Pi Vanlalawmpuii Chawngthu hian a bial chhung Mualcheng khuaa hmeithai insakna tur Rs. 12,500 a hlan nghal bawk a. Mualcheng khawtlang hian an khuaa hmeithai Pi Lalnunpuii chenna tur in chu sak sakin an khawtlangin an ngaihtuah mai theih loh chi insakna bungrua hrang hrangte lei nan Pi Vanlalawmpuii Chawngthu hian he pawisa hi a pe a ni. Tunah hian he in hi sak hi luah luh theiha peih a ni tawh a ni.