Vawiin chawhma dar 11:00 am khan Pernod Ricard India (Pvt) Ltd. leh Mizoram Excise & Narcotics Department tangkawp buatsaihin Aizawl City Bus Owners Association’s Office, Ngaizel, Kulikawnah khualzin leh bungraw phur lirthei khalhtute tan ni hnih awh tur Free Eye camp neih a ni a, Home Minister Pu. R. Lalzirliana chu khuallian niin Pu. K.T. Beicho, IRAS, Commissioner & Secretary, Excise & Narcotics Department chuan program hi a kaihruai a ni. 

Pu. R. Lalzirliana chuan lirthei khalhtuten dan an ngaih pawimawh a tul zia leh lirthei an khalh hian an mahni nunna mai bakah midang nunna an kutah a awm tel ani tih hria a, zu leh ruihtheih thil dang lakah an fihlim a tul zia a sawi a. Driver te chu an eizawn nana pawimawh tak an mit enkawl that a ngaih thu sawiin Pernod Ricard India (Pvt) Ltd. leh Excise and Narcotics Department Mizoram ten hetianga lirthei khalh a eizawngte tana Free Eye Camp an buatsaih chu lawmawm a tih thu a sawi bawk. 

Free Eye Camp hi ni 1, 2018 dar 11:00 am atanga dar 3:00 pm thleng neih chhunzawm tur a ni a, Department of Opthalmology, Civil hospital Aizawl atangin Dr. Enghmingliani Ralte leh Opthalmic assistant pahnih in driver te mit an en sak dawn a ni. Eye Camp hawn naah hian Bus, Taxi leh Maxi Cab driver thahnem tak an rawn tel thei chu Pu. Prabal Joyti, Regional Marketing Manager, Pernod Ricard India (Pvt) Ltd. chuan lawmawm a tih thu a sawi bawk.