Pachhunga University College Mizo Department leh Mizo Poetry Society tangkawpin an buatsaih 'Second Poetry Festival for Young Mizo Poets' chu vawiin khan Pi Vanlalawmpuii Chawngthu, Minister of State chuan a hawng.

Sahitya Akademi bultuma Pachhunga University College Seminar Hall-a Poetry Festival buatsaihah hian Pi Vanlalawmpuii Chawngthu chuan, Mizote chu zai leh lam ngaina hnam kan nih thu sawiin, "Pathian fak nan te, lungngaite thlamuan nan te, kan hlim leh lawmna puanchhuahnan te kan zai zel a, kan awmkhawm let let tawh chuan kan zai zel a, lirtheia chuanhonaah thleng kan zai zel a ni," a ti a, hetianga sak tur hla tha tak tak phuahtute chu ngaihsanawm a tih thu a sawi bawk.

Khawvel pawhin poetry chu a ngaisang a, chuvang chuan UNO hnuaia UNESCO pawhin March ni 15 chu 'World Poetry Day' ah hian a puan thu Pi Vanlalawmpuii Chawngthu chuan sawiin,'Poetry hi inremna siamtu, ram leh hnam humhalhna leh environment humhalhna atana thil tangkai tak a nih avangin UNO pawhin world poetry day a siam chhan a ni' a ti bawk.

Pi Vanlalawmpuii Chawngthu chuan Pachhunga University College Mizo Department hmalakna leh hmasawnna chu fakawm a tih thu a sawi a. Certificate Course in Mizo Cultural Studies and Performing Arts an buatsaih tur te, July thla atanga MA (Mizo language and literature) an hawn thar tur te, Massive Open Online Course (MOOC) hmanga 'Mizo Language and Style' an buatsaih mek te chu fakawm a tih thu sawiin, 'Mizo thu leh hla leh Mizo tawng te hi kan humhalh zel a tul a, Mizo thil leh Mizona hiu humhalaha chawisann zel a tul a ni,' a ti bawk.

He festival hawnna inkhawm hi Pu C.Vanhmingliana, Mizo Poetry Society Vice President chuan a kaihruai a, Sahitya Akademi Regional Office, Kolkata atangin Mr. Goutam Paul chuan inlawmna thu a sawi, Pachhunga University College Vice Principal, Dr. Lalbiaksangi Chawngthu chuan thu a sawi bawk. Mizo Poetry Society President Prof. R.L Thanmawia chuan poetry chungchangah keynote address a sawi a, Dr. Zoramdinthara leh H.Laldinmawia, Assistant Professor, Department of Mizo ten thu an sawi bawk a. Lalduhsaki, Mizo Department zirlai leh Chhawkhlei Cultural Club ten zai leh lamin kalkhawmte an awi a ni.

Thalaite tana poetry festival buatsaih hi a vawihnihna a ni a, he festival-ah hian thalai hla phuahthiam mi 50 vel an fuankhawm a, an poetry phuah te an chhiar chhuak a, naktuk Inrinni hian an chhunzawm leh dawn a ni.​

 

Attachment

  • Loading attachment...