Vawiin hian Government Eastern High School, Diamond Jubillee chu Biate ah Pi Vanlalawmpuii Chawngthu, Minister of State, Sericulture etc. leh bialtu MLA nibawk chuan khuallian niin a hmanpui.

Kal khawmte hmaah Pi Vanlalawmpuii Chawngthu chuan thu sawiin, Govt. Eastern High School in a kum 60 na hun hmang theia a awm chu lawmawm a tih thu a sawi a. Biate chu zirna ngaisang thin khua, kan mi pawimawh tak tak te lo inzir chhuah tawhna na khua ani a, tuna zirlai ni mekte pawh hian an hnung zuiin he khua ti hmingthatu nih an tum chhoh zel a tul a ni, a ti. Zirlai naupangte chu an zirlai piah lam thil dangah inhman chin tawk hre tura chahin, lehkha kan zir phawt anga kan thiamna leh finnate khawtlang leh ramin kan la mamawh dawn chauh tih hriain, hman tlak leh chhawr tlaka kan zirchhuah phawt a tul a ni, a ti. Kan ram, kan hnam siamtha tur hian thangtharte hi kan pawimawh a, Politics tha kan  neih theih nan tun atanga kan ngaihven a pawimawh a, Politics hi eiruk zirna hmun ani lova, hausak puina tur hmun a ni hek lo, a ti bawk.

Mizorama khawfai ber an nihna chu vawng nung zel a, faina avanga mite tlawhchak khua nih tum zel turin a ngen a.Fai ber lawmman lak beisei vang chauha fai ni lovin, tun hma atanga khawfai an nih avangin faina kawngah mite entawn tlak ni zel turin duhsakna a hlan ani.

Govt.Eastern High School hi kum 1958 a din ani a, Diamond Jubilee lawmna hun hi Pi Lalhmingliani, Headmaster in a kaihruai a, School naupang ten Items chi hrang hrang entirna neiin, he schoola zirtirtu lo ni tawhte hnen atangin thusawi ngaihthlak a ni bawk a, khawtlang hruaitu pawl hrang hrang ten hman puiin tlaiah Jubillee ruai theh ho ani.