Vawiin chawhnu khan N. Mualcheng Bazar-ah bialtu MLA leh Minister of State for Cooperation etc., nibawk Pi Vanlalawmpuii Chawngthu chuan Mualcheng khawtlangin an din thar Primary Agriculture Credit Scheme a hawng.

A hawnna inkhawm bazar shed a neihah Pi Vanlalawmpuii Chawngthu chuan Primary Agriculture Credit Society (PACS) chu kuthnathawktu tangrual ten anmahni hmasawn zelna tura Bank an din a nih thu sawiin, PACS member ten bul tanna tur an thawhkhawm a, mipuiten pawisa a pung awma dahin chung pawisa tlingkhawmte chu a mamawh ten pung awm bawkin an puk thei a. Hei vang hian loneitute tan a tangkaiin hmun tam takah hlawk takin an kalpui mek a ni. Mualcheng khaw thenawm mai Khawlailungah pawh tangkai taka kalpui reng a ni tawh a ni, a ti a. Tlem lua awm chuang lova kuthnathawktuten pawisa an khawl theihna a ni hi a tangkai bikna a ni, a ti. Minister chuan a bial chhung khuate chu khaw taima leh thawkrim tak thin nia a hriat thu sawiin chhuanawm a tih thu a sawi a. An thawhrim rah nasa zawka an seng chhoh zel theih nan PACS hi a tangkai tial tial dawn a ni, a ti. Sawrkarin kuthnathawktute tana hma a lakna hrang hrangte sawiin tun hnai maiah pawh Hrangturzo bial chhungah Agriculture Link road engemawzat a laih thar thu a sawi a, khaw chhung tihhmasawnna hna pawh hmun tam takah thawh a nih thu a sawi bawk. Heng sawrkarin an tana hma a lakna te tangkai taka lo chhawr a, tanpui phu renga hnathawk thin an nih zia lo tilang turin a ngen bawk. PACS tharin an bultanna tur inhlawhna an lo dil chu a rang thei ang bera a pek tur thu leh Mualcheng Unit MUP Building tihpuitlinna tur an lo dil pawh a rang lama ngaihtuah sak tur thu a sawi a ni.

Hengte bakah hian faina lama Hrangturzo bialin dinhmun tha tak a luah avanga a lawm thu te, hmasawn zel tura beih sauh sauh a pawimawh thute a tarlang a. Mizoramah HIV Positive an tam chak zia leh inven fimkhur a tul tak zet thu a sawi bawk. Thu a sawi zawh hian Minister hian PACS Office thar hi hawngin amah ngei hian account a hawng hmasa ber nghe nghe a ni.

He hunah hian Mizoram chhunga PACS hrang hrang enkawltu Pu H. Remsangpuia, PACS Resource Person, Mizoram Co-operative Apex bank chuan PACS kalpui dan leh an hnathawh theih hrang hrangte sawifiahna a nei a. Mizoramah an enkawl PACS 26 a awm tawh thu leh Serchhip District ah PACS pahnih a awm tawh thu sawiin Mualcheng hi pathumna a nih thu a sawi a. Kuthnathawktute tana PACS thatna bik chu pawisa tlem te te engtiklai pawha va dahkhawl ker ker theihna hmun a nihna hi a ni, a ti. Mizorama PACS tha zualte phei chuan Deposit pawh Rs. 200 lakh chuang, Loan pek chhuah pawh Rs. 200 lakh chuang nei an awm thu te, dawr lian leh School tha tak tak neite an awm thu a sawi a. PACS te hi an thawh that phawt chuan NABARD atanga tanpuina a awm thute a tarlang bawk. PACS chu dan anga din ngai, mumal taka sawrkar dan hnuaia kal, pawisa dahna him tak a nih thu a sawi lang bawk.

He PACS thar hawnna inkhawm hi Pu Lalsiama, Chairman, Mualcheng Farming Society chuan a kaihruai a, Mualcheng Village Council aiawhten thusawina hun an hmang bawk a ni.