Vawiin khan Mizoram Khadi and Village Industries Board's Office, New Secretariat Complex, Aizawl ah Major Honey Mission hnuaia thlan chhuah mi 10 te hnenah khuaibu leh a bawm semna hun hman a ni a, he hunah hian Commmerce & Industries Minister Pu H.Rohluna Khuallian niin Pu. K.Lianzuala, Chairman Mizoram KVI Board chu Khual Zahawm  a ni bawk.

Minister Pu H.Rohluna chuan khuaibu dawngtute chu tihtakzeta an khuai dawn te enkawl a, eizawnna tling a hmang turin a chah a, khawizu tam zawk leh tha zawk tharchhuak a, ram hausakna thlen tham a bei turin a fuih bawk a. Mizo thalaite chuan eizawnna atan thiam thil an neih a tul zia tarlangin, khuai khawite pawh hi taimakna nen chuan eizawnna tha tak a nih thu a sawi bawk.

Pu. K.Lianzuala Chairman Mizoram KVI Board chuan thusawiin khuai chu thing leh pangparte in thlahchhawn nana hna pawimawh tak thawktu an nih avangin mihringte tan pawh an tangkai hle a ni, a ti a. Khuai enkawltute chu huaisen taka bei turin a chah a, Major Honey Mission hi Mizoramah hlawhtling taka kalpui a nih chuan kan ram hian a hausakpui ngei a rin thu a sawi bawk.

Pi Rualkhumi, State Director KVIC hnen atangin Honey Mission chungchang ngaihthlak niin, Khuai khawitu zing atangin thusawi ngaihthlak a ni bawk a, Chief Executive Officer, Mizoram KVI Board in lawmthu sawina hun a hmang bawk.

Major Honey Mission Programme atan hian cheng Nuai 344.13 ruahman niin, mi 750 hnenah Khuaibu leh a bawm 7500 sem chhuah tura buatsaih a ni. 1st Phase atan mi 10 hnenah khuai bawm 5 leh khuaibu 5 theuh pek a ni. Mizoramah Bee Keeping Association 91 an awm a, khuai khawitute hnenah khuai bawm leh khuaibu hi sem chhunzawm zel tura ruahman a ni.