Vawiin chawhnu khan Sakawrhmuituai Tlangah Tourism Minister Pu John Rotluangliana chuan Tourism Department hnuaia Development of Eco-Adventure Circuit Aizawl-Sakawrhmuituai Tlang (Skywalk leh Ropeway) siamna tur lungphum a phum a. Dy. Speaker Pu R. Lalrinawma leh Pu Hmingdailova Khiangte, MLA te chu he hunah hian Khualzahawm an ni a. Pu Lalrinliana Sailo, MLA pawhin a telpui a ni.

Tourism Minister Pu John Rotluangliana chuan vawiin hi Tourism dept bakah Sihphir leh Lungdai khuate tan ni chhinchhiahtlak tak a ni, a ti a. Mizoram tan hmasawnna lama mellung pawimawh tak a ni, a ti a. Mizorama a hmasa ber tur Skywalk siam thei tura lungphum phumna hun hman a ni chu lawmawm a tih thu a sawi a. Skywalk hian khualzinte hipna atan thil dang hrang hrang souvenir dawr, camping ground, viewing gallery leh a dangte a keng tel dawn a ni tiin thalaite tan pawh hawi thawvenna tur hmun tha tak a ni dawn a ni, a ti a. He project hlawhtlin nan hian Sihphir leh Lungdai mipuiten rilru zau leh inhawng takin khualzinte an lo chhawn a ngai thin dawn a ni, a ti a. Neitu nihna rilru pu turin khaw mipuite chu a chah a. Sihphir leh Lungdai khaw Village Council te nen thawhhona thuthlung fel tak ziak a nih thu a tarlang bawk.

Khualzahawm Dy. Speaker Pu R Lalrinawma chuan thu sawiin project chu Lungdai leh Sihphir mipui tan thil lawmawm tak a nih thu a sawi a. Khaw mipuiten eizawnna kawngah an  chhawr hle dawn a ni, tiin khualzinte in lo dawnsawn thiam a ngai dawn a ni, a ti a. Hmasawnna tha tak a nih thu sawiin Sihphir leh Lungdai NGO ten phur taka hmalakna an tawiawm chu lawmawm a tih thu a sawi bawk. Khualzahawm Pu Hmingdailova Khiangte, MLA chuan tourism hmalakna chu hmasawnna lawmawm tak a nih thu sawiin project hlawhtling tak a nih ngei a beisei thu a sawi a. Project chu ruahmanna ang ngeia a hlawhtlin theih nan duhsakna a hlan nghal a ni.

Development of Eco-Adventure Circuit Aizawl-Sakawrhmuituai Tlang hi khualzinte hipna lama Mizoramin hma a sawnna tur project a ni a, sawrkar laipuia Ministry of Tourism hnuaia Swadesh Darshan Scheme atangin kum 2017-2018 chhungin cheng nuai 9907 hmuh a ni a. He project hnuaiah hian Aizawl leh a chhehvela hmun 11 thlan chhuah a ni a, heng hmunte hi khualzinte tlawh chakawm tura siam a nih theih nan hmalak mek a ni a. Heng hmunte hi-Aizawl, Rawpuichhip, Khawhpawp, Lengpui, Durtlang, Chaltlang, Sakawrhmuituai Tlang, Muthi, Berawtlang, Tuirial Airfield, Hmuifang te an ni a. Heng project thawk tur hian Leading Edge Pvt.Ltd rawih an ni a, hmun thenkhatah hna thawhtan tawh a ni.

Sakawrhmuituai Tlang hi khualzinte hip nan leh mipuite chawlh hahdamna hmun atan cheibawl tum mek a ni a, Sihphir atanga ke a thlen theih tur (trekking) leh Lungdai atanga ropeway hmanga tawlhluh theih tura ruahmanna siam a ni a. Hemi hmang hian kum lama upa deuhte leh pianphunga rualbanlote chenin awlsam takin Sakawrhmuituai Tlang hi an thleng ve dawn a ni. Hemi tlangah hian Mizorama a hmasa ber turin Skywalk metre 25 laia sei, a chhuat darthlalanga siam tum a ni bawk a. Hemi hmunah hian Skywalk bakah visitors centre, bamboo craft workshop & souvenir shop, nature trail, viewing gallery, camping ground leh watch tower thlenga siam tura hmalak a ni a. Heng ruahmannate hi zawhfel a nih hnuah chuan Lungdai leh Sihphir khuate hnenah a enkawlna leh mawhphurhna hlan a ni ang.  

Tourism Additional Secretary Pi Zoramthangi Hauhnar chuan hawnna programme kaihruaiin kalkhawmte lawmna thu a sawi a. Leading Edge Pvt.Ltd atangin Pu Satish Pathania chuan project report a pe a.Tourism Minister chuan lungphum phumna hun a nei a. Lawmthu sawina in Tourism Department Director Pu Biakthanmawia Pautu chuan programme a khar a ni. Tourism Department hotute leh hnathawkte, Sihphir leh Lungdai NGO hruaitute leh khaw mipuite an tel a ni.