Sawrkar laipuia Ministry of Textiles hnuaia Research Extension Centre, Central Silk Board (CSB) Aizawl leh District Sericulture Office, Champhai tangkawp buatsaih Maimaw Pangang khawitute tana‘Chawki Rearing Training’ March ni 23 atanga neih tan tawh  chu vawiin chawhnu khan Govt. Mulberry Seed Farm, Champhai Kanan Vengah a kharna hun hman a ni. He hunah hian Chawki khawitur semna hun neih  nghal a ni.

Pu B.Lalchhuana District Sericulture Officer (DSO) chuan he hun hi a kaihruai a.  Silk la deh chhuah kawngah India chuan nasa taka tan a lak thu leh  pangang khawitute pawhin hemi hi tipuitling thei ngei tura an beih sauh sauh angaih thu a sawi a. Training chhimtute chu an thiam thil zir chhuahte chhawr tangkaia  Cocoon quality tha leh tam zawk thar chhuah tum turin a chah a. Chawki khawi tur sem chhuah dawngtute pawh an enzui zel tur leh puih an ngaihna anga puih zel an tum thu a sawi a ni.

CSB lam atanga lokal Resource Person Pu Vanlaldinga chuan Training hun an hman dan tlangpui leh pangang khawitute tana hriattur awm angte hrilhfiahna a nei a. Pu HD Thandanga, Sericulture Promotion Officer (SPO), Khawzawl chuan training chhuakte hnenah Certificate hlanin fuihna thu a sawi a. Inpekna leh taihmakna nena pangang khawi a pawimawh thu a sawi a. Pangang khawi chu thil uluk ngai tak anih avangin training mumal tak neih angaih thu a sawi a.  An zirchhuahte midangte hlan chhawng thin turin a chah nghal bawk a ni. He hunah hian Training chhuak atangte pawhin thusawi ngaihthlak a ni a.  

Training kharna programme-ah hian Dr Lallawmkima DIPRO, Champhai pawhin thu sawiin training chhimtute chu an thil zir chhuahte  an mahni khua theuhah  a tangkai thei ang bera  hmang turin a chah a. Training chhuak an nihna chu an thiltihah a lanchhuah a beisei thu a sawi bawk a ni. DIPRO chuan Bethel Cluster hnuaia maimaw pangang khawiturte hnenah Chawki pangang a sem chhuak a ni. Pi K.Lallawmzuali, Sericulture Extension Officer (SEO), Training Co-ordinator in lawmthu sawina hun hmangin hun a khar a ni.

Chawki awmzia tak chu Maimaw pangang a tuikeu atanga vawihnih / vawithum an inlip thleng hi niin Chawki uluk bika enkawl hi Cocoon quality tha leh tam zawk thar chhuah   kawngah a innghat thui hle a ni. Central Silk Board (CSB) hnuaia Intensive Bivoltine Sericulture Development Project (IBSDP) kaltlangin Champhai District-ah Self Help Group (SHG) 30 hnuaia chhungkaw 600 thlan niin chhungtin ten theihmu huan Tin chanve theuh an enkawl a. Chawki rearing (Chawki khawi) in a tum ber chu Maimaw Pangang khawi tura thlan chhuahte khawi tur mawimaw pangang chu  a Chawki hun chhung  training chhuak, a thiam bik ten an vulh sak anga, chu chu pangang vulhtu ten leisakin chawlhkar hnih chhungin Cocoon quality tha tak thar chhuak thei turin an khawi tawh dawn a ni.

Training tur hian Champhai District chhunga khaw hrang hrang leh Champhai khawchhung atangin mi 14 an tel a. Training chhung hian Central Silk Board (CSB) lam atanga mithiam lokal Pu Vanlaldinga (MTS) leh Pu Utpal Bora (Field Assistant) zirtirna leh a taka entirna hunte an hman pui thin a ni.