Vawiin khan Social Welfare Minister Pu PC Lalthanliana chuan Mizoram University, Social Works Department-ah ‘Disability in Mizoram: Challenges and Response’ tih thupui hmanga Seminar buatsaih a hmanpui.

Pu PC Lalthanliana chuan rualbanlote hamthatna tura Mizoram sorkar hmalakna hrang hrang a tarlang a. A tarlan zingah chuan pianphunga rualbanlote tana sorkar hna hrang hrangah 3% hauhsak an nih thu leh hemi avang hian mi engemawzatin Mizoram Civil Service, Mizoram Judicial Service leh Mizoram Animal Husbandry and Veterinary Service-ah hna an zawm tawh thu te; 2010-2011 chhunga rualbanlo mi 122 hnenah National Handicapped Finance and Development Corporation kaltlanga Mizoram Rural Bank-in loan cheng nuai 50 vel zet a puk tir tawh thu te; SCERT, Social Welfare, School & Higher Education Department ten rualbanlo zirlai te tan tanpuina an pek thin thu te leh Mizoram State Tranport Bus-ah manlo a an zin veivah theih dan te a tel a. Social Welfare Department hian pianphunga rualbanlo zawnchhuah leh chhinchhiah fel hna chak taka thawkin kum 2010-11 chhung hian hetiang mi 1576 te ziak luh an nih tawh thu Minister hian a sawi lang bawk a ni. Social Welfare Minister chuan kumin sorkar kum kal mek ral hma ngei hian pianphunga rualbanlote hmakhua ngaihsak tu State Commission Office hawn hman ngei a beisei thu a sawi chhuak bawk. Sorkar leh vantlang punkhawmna in ang chi reng rengah hian rualbanlote tana awlai taka an lawilenna tur ruahmanna siam ngei ngei tura sorkar laipuiin thuchhuah a siam tawh te chu Mizoramah hian duhthusama zawm a la nih ve loh thuah Minister chuan hei hi mipui vantlang pawhin zau zawkin hria se a duh thu a tarlang tel a ni.

Professor AK Agarwal, MZU Vice Chancellor aiawh pawhin thu sawiin rualbanlote tan Center for Disabilities Studies chu MZU Campus-ah bun tum a ni a, hemi atana thawhhona thuthlung pawh MZU leh National Institute of Orthopaedically Handicapped (NIOH) ten thlaleh hian an siamfel hman beisei a ni tiin MZU pawhin ram mamawh tur a thehchhuah tur thu a tarlang.

He Seminar hawnna inkhawm hi Community Based Rehabilitation (CBR) Project Director Pu Henry Zodinliana’n a kaihruai a. Dr Ratnesh Kumar, NIOH Kolkata Director chuan thu kamkeuna hun a hmang. Chawhnu lamah seminar hi chhunzawm niin State pawn atanga lokal mithiam te bakah Mizoram University leh SCERT atanga mithiam thlanchhuah ten an thuziak chhiarchhuakin sawihona hun an hmang a ni.