Vawiin khan Cooperative Societies Secretary leh Registrar Pu Jack L.Darkim IRTS, hovin Mizoram Pig Producers’ Cooperative Federation (PIGFED) chuan General Assembly vawi 21-na, Chanmary YMA Hall-ah an hmang.

Pu Jack L.Darkim chuan Mizo te chu pi leh pute atanga thawhho leh tanrual rilru pusa, hnatlang leh a huhova thawk thin, cooperation rilru pu kan ni, a ti. Capitalism-ah chuan hausa leh rethei inkar nasa takin a zauva, mirethei tan dinchhuah a harsa thin a, cooperation din a nih erawh chuan tangrualin mi tam zawkin hlawkna an tel ve thei thin, a ti a. India ramah chuan Jawaharlal Nehru dinchhuah niin ram pumah hlawk taka kalpui mek a ni, a ti bawk.

Inkhawm hi PIGFED Chairman Pu F.Zosanga’n a kaihruai a. Managing Director Dr. Lalnuntluanga Colney chuan kumkhat chhunga an pawl chet vel dan a report a. Cooperative Societies Addl. Registrar leh AH&Vety Director te pawhin thu an sawi a ni.