Mizoram sorkarin zirna tihhmasawnna tura a ruahmanna ‘Educational Campaign’ bultanna chu vawiin khan Lunglei Saikuti Hall-ah neih a ni a, Education Parliamentary Secretary Pu Joseph Lalhimpuia chuan he Campaign Kick-off hi a hmanpui a ni. State pum tuam tur Educational Campaign thupuiah chuan ‘Education For All-Round Development’ tih vuah a ni.

Campaign hawnna inkhawm Lunglei DEO Pu R.Lalthakima kaihhruaiah Parliamentary Secretary Pu Joseph Lalhimpuia chuan zirna hi school building tha-ah innghat a ni lova, zirtirtu leh zirlaite thahnemngaihnaah a innghat zawk a ni, a ti. Tunlai khawvel Information Technology-in a tuamkim tawhah hian zirlai naupangte chu internet hmangin an hriat duh zawng mai bakah chanchin tharlam ber ber pawh an ban phakah a awm vek tawh avangin, ramdanga zirlaite aia an hnufual bikna chhan tur a awm lova, hei hi Mizo naupang zirlaite tan chona a tling a ni, a ti. Mizoramah education hmasawn tak tak tur chuan ‘trained teacher’ kan mamawh a ni tiin Pu Joseph Lalhimpuia chuan India ram pumah pawh zirna tihhmasawnna turin zirtirtu ‘trained’ chauh lak leh hlawh pek tur tiin Sorkar Laipui chuan thuchhuah a siam hial tawh a ni, a ti. Hemi bawhzuiin Mizoramah pawh kum 3 chhungin zirtirtu training kim thei vek turin ruahmanna siam tum a ni a, ‘textbook teacher’ chauh ni tawh lovin zirlai naupangte talent haichhuah sak thiam thei turin zirtirtute pawh intuaihriam theuh an ngai a ni, a ti. Zirnaah chauh ni lo, thil tam takah Mizoten harsatna kan tawh mekte hi keimahni leh keimahni kan insiam sak a nihna lai thui tak a awm a; faina, hriselna, ram leilung enkawl, thing leh mau humhalh kawngah te tan lak a ngaih nasat thu hriain sorkar chuan Education Department kaltlangin heng thilahte pawh state pumah hmalak a tum thu Pu Joseph chuan a sawi a. Lunglei-ah zirtirtu 40-50 riah theihna ‘Teachers’ Guest House’ sakna tur chu sorkarin a ngaihtuah mek a ni, a ti bawk.

Joint Director SCERT Pi Laldawngliani Chawngthu pawhin thu sawiin ‘Education’ chu rintlak leh belhchian dawl tur a ni a, hmantlak leh tunlai khawvel nena inmil tur a nih avangin a tul a nih chuan zirtirtute pawhin an ngaihtuahna leh sukthlek zawng pawh an insiam danglam ngam tur a ni, a ti. Right to Education chuan sikul leh zirtirtute lakah a phut sang hle a, kum 14 hnuai lam tan compulsory education te, sikula hmeichhe zirlai naupangte tan zunin hran siam te leh naupang chunga kuttthlak a khap bakah zawm tur tam tak a awm a, naupang kan zirtirnaah hian heng zawng zawng hi bilhluh kan thiam a ngai dawn a ni, a ti. Tunlai khawvel mila education kan kalpui tak tak dawn a nih chuan ‘English’ hi kan thiam a, kan hman uar a pawimawh deuh deuh dawn a ni tiin Pi Dawngi chuan Science subject zir tur phei chuan Saptawng thiam ngei ngei a ngai a ni, a ti a. Kan zirlaiten nun an hmachhawn zelna turah pawh Saptawng an thiam hi a pawimawh hle a ni, a ti. Hmarchhak bialah Arunachal Pradesh, Nagaland leh Sikkim te chuan sikul zawng zawngte chu ‘English Medium’-in an kalpui vek tawh thu a sawi a, India ramah hnam hrang hrang kan chenho avangin Saptawng chu kan inbiakpawhna leh min phuarkhawmtu hmanrua pawimawh tak a ni, a ti bawk.

Vawiin Educational Campaign-ah hian Joint Director School Education Pu JH Biakmawia, Dy.SPD (RMSA) Pu VL Malsawma leh Addl. SPD SSA Pu V. Lalsiamthara te pawhin thu an sawi a. He hun hmang tur hian Lunglei-a School Principal leh zirtirtu zawng zawngte an kal kim hle a, Education Department leh SCERT hotute nen thupui sawizauna leh zawhna leh chhana hun an hmang nileng a ni.