Chief Minister Pu Lal Thanhawla hovin vawiin khan Vanapa Hall-ah ‘World Milk Day’ hman a ni.

Chief Minister chuan vawiin hi kuthnathawktu bawng vulhtute tan ni pawimawi tak a ni a ti a.Bawnghnute hlutzia leh mihringte hriselna atana a pawimawhzia hria a hetiang hun buatsaih a ni chu a lawmawm hle a ni a ti a. Kuthnathawtute pawimawhzia hriain sorkar chuan ‘Kuthnathawktute Ni’ alo puan tawh thu a sawi a. Ei leh bar leh sum leh paia intodelhna kawngah kuthnathawktute chu a pawimawh hmasa ber an nih avangin sorkar pawhin NLUP hmangin an mahni chawikan chu a tum bulpui a ni a, UNO pawhin rawn hriatpuiin kuthnathawktute tan a phurawm hle ang tih a ring a ni tiin, he ni hi infuih chhoh zelna tur atan hman nise a duhthu a sawi a ni.

Chief Minister chuan ringtu kan nih angin chawlhni leh inkhawmna hunah chauh nilo, kan nitin hnathawhnaah ringtu kan nihna hi rim taka hmang tur kan ni tiin, midangte tana malsawmna ni thei turin rinawmna, dikna, taimakna leh Pathian tihna nung nen tui takin kan hna theuh kan thawk tur a ni a ti a. Sorkar angin tih tur tam tak kan nei tih kan hria a, mahse duh angin a tih zung zung theih thin loh a, a tahtawla kalpui a ngai thin a ni a ti. Mizoten kan tharchhuahte tam kan tih hi midangte tan tam anih thin loh avangin ram leh hnam anga intodelh tur leh eizawnna tling ni tura kalpui tur chuan nasa leh zuala hma kan lak a ngai hle a ni a ti.

United Nations Organisation hnuaia Food and Agriculture Organisation in June ni 1 hi kum 2001 atang khan ‘World Milk Day’ ah alo puang tawh a. Mizoramah a vawi khatna atana kan hman tan kumin 2014 June ni 1 hi chawlhni ah a tlak avangin remchan zawknain vawiin ni 5 June 2014 hian kan hmang ta zawk a ni. He ni hmang tur hian AH & Vety Department leh MULCO tangkawpin an huaihawt a, he ni denchhen hian inelna hrang hrang, MULCO a bawnghnute chhung tam, society leh mimal anga chhung tam, bawngpui nei tha leh bawnghnute sawrchhuak tam, bawng enkawl thatah te leh slogan ziah intihsiakna te buatsaih niin, lawmman te siam a ni.

Mizoramah bawnghnute tam zawk tharchhuah anih theihna turin Mizoram Milk Producers’ Cooperative Union Ltd hi ni 5.6.1984 khan din a ni a, awlsam zawka hriat anih theih nan MULCO tiin kalpui a ni a, Aizawl Thuampui, Zemabawk vengah officepui a awm a ni. Bawnghnute sawrchhuak pawl Society hrang hrang 34 in ziaklutin, nitin bawnghnute an chhunglut a, hei hi MULCO hian bawnghnute bakah paneer, dahi, lassi,rosgulla, rosmalai leh gulabjamun te mipui lei theihin an siam a, khawl changkang ‘Indigenous Milk Product Plant’ hawn anih hunah chuan flavoured milk te, sterilized milk te, ghee leh yogurt te a siam belh thei dawn a ni.

Inkhawmah hian Mizoram hmun hrang hrang atangin bawng vulhtu thahnem tak an tel a, chawhnu session ah paper presentation leh sawihona neih chhunzawm a ni.