Sawrkar laipui a Ministry of External Affairs (MEA) buatsaih leh bul tum in Know India Programme (KIP) a tel People of India Origin (PIO) thalai 40 rual chu anmahni buaipuitu MEA officer 3 te nen vawiin khan Aizawl an lo thleng. Heng thalai te lo dawngsawnga anmahni lo buaipui tura ruat, Department of Labour Employment, Skill Development and Entrepreneurship aiawhte te chuan thalai te hi vawiin khan Lengpui Airport ah lo hmuakin a ni.
Ruahman lawk ang chuan naktuk hian Aizawl leh a chhehvel a hmun pawimawh thenkhatte tlawhpui an ni dawn a. Thawhtan chawhmaah Mizoram University zirtirtute leh zirlaite nen inkawm hona an nei ang a, chawhnu lamah Larsap an hmu ang. Zan lamah anmahni pualin Department in Cultural programme leh zanriah Aijal Club-ah an buatsaih dawn a, hetah hian State Sawrkar houtute nen inkhawm hona hun an nei bawk ang. Thawhlehni ah Delhi an pan thla leh ang a, Delhi ah hian MEA ah presentation neiin Pi Sushma Swaraj, Union Minister for External Affairs an hmu ang.
KIP ruahmanna hi People of Indian Origin te awmna ram (Fiji, Guyana, Suriname, Trinidad & Tobago leh adangte) thalai te tana India ram chanchin zirna leh hriatna programme niin KIP tour hi Mizoram in a thlen vawi khatna a ni a. He KIP hi a batch 48-na niin Mizoram an tlawh hma in Manipur an tlawh a ni. KIP programme ah hian ni 25 chhung India ramah cham in hmun hrang hrang te zin kual pui an ni a, state pahnih khat chanchin kimchang zawka an hriat theih nan state te tlawhpui leh zinpui an ni thin a ni.
Know India Programme hi 2003 khan MEA in tan in kum 2014 atang khan ngawrh zawkin he programme hi an kalpui a. 2016 atang khan programme neih dan te thlak niin kum khat a tum ruk buatsaih a ni thin a, a tan tirh atangin PIO thalai 1500 bawr velin India ram an tlawh tawh an ni.
