Vawiin khan Lawngtlaia NIC Video Conference Hall-ah MLA Inthlanpui 2018-a Lawngtlai District-a constituency pathuma vote thlak nana EVM & VVPAT hman theih tur chin leh a hmanna tur constituency thliar fel a ni.

He hunah hian constituency pathuma RO pathumte bakah, Election Officer, DIPRO leh political party hrang hrang ai awhte an tel a. EVM & VVPAT thliar fel nan hian Election Commission of India (ECI) randomisation software hman a ni a. Lawngtlai District-a EVM & VVPAT kawl zawng zawng unit ID chu he software-ah hian dah luh niin, software hian inthlannaa hman tur chin a lo thliar a ni.

Lawngtlai District-ah hian EVM (control unit leh ballot unit) & VVPAT endik sa training-naa hman tur sawmthum vel theuh dah hran bak inthlannaa hman theih tura dah CU 228, BU 226 leh VVPAT 230 a awm a. Vawiina randomisation atang hian Polling station 59 awmna 36-Tuichawng Constituency atan EVM (CU & BU) 71 ve ve (mamawh zat 59 ve ve bakah reserve tur 12) leh VVPAT 86 (mamawh zat 59 bakah reserve tur 27) dah fel a ni a. Polling station 68 awmna 37-Lawngtlai West Constituency atan EVM (CU & BU) 82 ve ve (mamawh zat 68 ve ve bakah reserve tur 14) leh VVPAT 98 (mamawh zat 68 bakah reserve tur 30) dah fel niin, polling station 34 awmna 38-Lawngtlai East Constituency atan EVM (CU & BU) 41 ve ve (mamawh zat 34 ve ve bakah reserve tur 7) leh VVPAT 46 (mamawh zat 34 bakah reserve tur 12) dah fel a ni.

Vawiina tih tak first level randomisation of EVM & VVPAT-ah hian EVM & VVPAT te chu a hmanna tur constituency thliar fel a ni a. November ni 12-a second level randomisation tih hunah chuan an hmanna tur polling station thliar fel niin, November ni 20 & 21-ah te hman theih tura commission a ni ang.

Vawiina EVM & VVPAT randomisation tih zawh hian political party hrang hrang ai awhte chu EVM & VVPAT dah thatna strong room enpui nghal an ni a. EVM & VVPAT dahte chu khawih danglam theih loh tura him taka vawn that a nih dan enpui an ni.