Vawiin khan Lawngtlai DC Conference Hall-ah MLA Inthlanpui 2018 atana Lawngtlai District inpuahchahna hrang hrang Expenditure Observer Pu Pema Tshering Bhutia IRS hovin thlir ho a ni.
Expenditure Observer Pu PT Bhutia chuan election atana Lawngtlai District inbuatsaihna chu a hmuh theih chinah a tha thawkhat viauva a hriat thu sawiin, inthlan felfai tak buatsaih a nih ngei a beisei thu a sawi a. Inthlan felfai tak a awm theih nana expenditure monitoring pawimawhzia sawiin, mi tinin hamthatna leh chanvo thuhmun an chan vekna tura inthlei bikna awm lo inthlan buatsaih a nih theih nan inthlana mawhphurhna nei zawng zawng, a bik takin sum hmanna (expenditure) lam kaihhnawih buaipuitute chuan finfiahna tha tak nei thlapa eng kim ti turin a chah a, party leh candidate tinin sum an hman dan dik taka enfiah leh chhinchhiah a, vote lei leh hralh te a awm loh nana hma lak chu an hna tur ber a nih thu a sawi.
He hunah hian Lawngtlai District Election Officer, 37-Lawngtlai West Constituency-a RO Pu N. Chakhai MCS leh RO dang pahnih te bakah, election team hrang hrang member-te an kal khawm a. Team hrang hrangte daily report theh luh dan tur leh an hna thawh dan tura zawhna awmte inhrilhfiah a ni bawk.
Meeting neih zawh hian Expenditure Observer hian Asst Expenditure Observer team, Accounting Team leh Video Viewing Team te thutna leh Media Monitoring Control Room te a hmunah a tlawh a. Thil pawimawh tur hrang hrang an sawi ho zui nghal bawk a ni.
