Vawiin chawhnu dar 2 khan Champhai DC Conference Hall-ah kumin MLA General Election lo awm tura Champhai District chhunga sum senso endiktu tur Expenditure Observer, Election Commission of India in a ruat Pu Santosh G. Parage, IRS hovin Election Expenditure Monitoring (EEM) team hrang hrangten meeting an nei.
Expenditure Observer Pu Santosh G. Parage chuan inthlanna dik leh felfai taka awm theihnan ECI in nasa takin tan a la a, mipui nawlpuiin inthlannna muanawm leh hlauhna awmlo an neih chu ECI duhdan a ni a, chumi tihlawhtling theitu chu inthlan kaihhnawiha tel team zawng zawngte inkara thawhhona tha awm hi a ni a, a ti a. Expenditure Observer chuan inthlan vuakveta thil thlengte a bik takin sum leh pai senso chelekte chu ECI in ngun takain a vil reng thu leh helam buaipuitu team hrang hrangte chu ngun leh zuala thawk turin a chah a. Hriatthiam loh an neihte zawh hreh lo tur leh team inkarah inpawhna leh thawhhona tha awm se a duh thu a sawi a. Inthlan felfai leh dik nei tur chuan hleibik leh duhsak zawng neih a thiang lo a, hna tikhawtlai lova mahni mawhphurhna theuh dik taka hlenchhuah angaih thu a sawi a. Champhai District bikah ramri kaltlanga thil diklo thleng tur ven nan ramri depah te uluk leh zuala duty a pawimawh thu a sawi a. Tumah inthlahdah loa inthlan zawh hma zawng mar tha taka thawk tura fuihin, Champhai District-ah inthlan felfai tak siampui tura lokal anih thu a sawi a. Expenditure Observer chuan Bank lam thawktute sum leh pai leng vel, banka dah luh leh lakchhuahah rinhlelh an neih chuan thuneitute hnena thlen vat turin a ngen a. Team tinte chu rilru fim tak hmanga khawtual mite puihna la thin tur leh harsatna awmte hotute hnena thlen thin tura chahin, “Kan za vai inkara thawhhona tha vang chauhin inthlanna hlawhtling tak kan nei thei a ni”, a ti bawk.
Dr Naveen Aggarwal, DEO Champhai pawhin sum leh pai lengvel viltu team tinte chu inthlanna fel leh dik awm theihna tura thawk chhunzawm zel turin a chah a. Pi Ethel Rothangpuii, Nodal Officer, EEM-in Election Observer lawmna thu sawiin a kaihhruaina hnuaia inthlan muanawm tak neih anih a beisei thu a sawi a, Chanmphai a cham chhunga hun tha tak hmang turin duhsakna a hlan a. Pu Lalremruata Kullai , Election Officer Champhaiin Mizoram People Forum (MPF) ten inthlanna muanawm leh felfai nei thei tura ECI an thawhpui dante he hunah hian a tarlang bawk a ni.
Meeting zawh hnu hian Accounting Team, Assistant Expenditure Observers leh Excise lamte chu a hrangin meeting a neih pui leh a, hmunhma te a tlawhkual bawk a ni.
Vawiina Observer-in EEM Team-te meeting a neihpuinaah hian District Election Officer Dr. Naveen Aggarwal; Pu Lalthiamsanga Sailo, SP; Pu K.Vanlalthiana, RO, 22-Tuichang A/C; Pi Ethel Rothangpuii, Nodal Officer, EEM leh RO 21-Lengteng & 23-Champhai North; Pu Abraham Beirazi Khithie, RO, 25-East Tuipui, ARO theuhte leh Election Expenditure Monitoring Teams hrang hrang, Assistant Expenditure Observers-te, Accounting Team, Flying Squad, Static Surveillance Team, Video Surveillance Team, Video Viewing Team, MCMC, Bank lama hotute leh District Control Room a thawktute an tel kim hle a ni.
