Vawiin khan MLA Inthlanpui 2018 lo awm tura Lawngtlai District chhunga constituency pathuma polling station 161-a 2nd Polling Officer leh 3rd Polling Officer tura ruatte tan Lawngtlaia Govt Region HSS-ah training buatsaih a ni.

He hunah hian 2nd PO leh 3rd PO tura ruatte an kal tha hle a. 1st session-ah polling official-te'n postal ballot hmanga vote an thlak theihna turin Form-12 buaipui a ni a. Polling official-te hian Form-12 dah khatin postal ballot hmanga vote thlak dilna an theh lut a. Hei hi Postal Ballot Nodal Officer, SDO (Sadar) Pi Rochuangkimi Khenglawt MCS chuan a buaipui a ni.

2nd session-ah EVM hman dan leh enkawl dan (EVM hands on training) leh polling official-te tih tur leh mawhphurhna hrang hrang zir ho a ni a. Polling official-te hi hmun ngaah inthen darhin, District Level Master Trainer-te - Pi Carolyn LB Khiangte MCS, Pu Vabeimozachhi Chozah MCS, Pu Lalsanglura MCS, Pi Christina Lalmuanzuali MCS leh Pu Timothy R. Lalhmangaiha MCS te'n training hi an pe a. Sawi hona leh zawhna leh chhanna hun hman nghal a ni bawk.

Nimin khan PRO leh 1st PO-te tan pawh training hi lo buatsaih tawh niin, training hi tum hnih dang la neih leh tura ruahman a ni.