State Investment Program Management & Investment Unit (SIPMIU) chuan nimin ni 9.11.2017 khan Aizawl khawpui chhunga pipe phum leh chhilh hna an thawh mek chungchangah mipui hriattirna a hnuaia mi ang hian a chhuah :
“Kumin hian, kum dang anglo takin, fur ruahtui tlak hma leh tlak chhung a rei hle mai a, November, 2017 thla tir thlengin ruahtui kan dawng a ni. Chutih rual chuan SIPMIU (NERCCDIP) hmalakna kawng hrang hrang, a bik takin Water Supply leh Sewerage (zun leh ek thli lakkhawmna tur lamah kawngpuia pipe phum leh chhilh hna tih fel hman loh fur ruahtui tlakin a rawn nan tak avanga zawh fel hleih theih loh tamtak a awm a ni a. Heng avang hian mipuiin harsatna leh rokhawlhna nasa tak an tawrh phah a ni tih hriat a ni a, chuti chung chuan a thawktu SIPMIU-ten mipui hriatthiamna leh dawhtheihna an dawn avangin mipui hnenah lawmthu an sawi a ni.
Tunah hian khua a lo hul leh tain heng kawngpui chul mam leh siamthat hna runpui hi a tha leh chak thei anga thawh tumin hma an la leh ta a. Kawngpui tam takah a hmangtu mipuiten harsatna nasa zawk an pumpelhna turin Pathianni-ah te, zan lamah tlaivar tein tunah hian an thawk tan leh mek a. Tunah hian Khatla kawngpui (kawng chung leh kawng hnuai), Zohnuai-Vaivakawn kawngpuiah te, Ramthar Veng, Bawngkawn, Sihphir Chhangurkawn leh Chawnpuiah te thawkin, Tuikhuahtlang kawng te leh Thuampui kawng an te thawk chhunzawm zel tura hma lak a ni a.
Chutiang ang chuan Krismas lo thleng turah mipui tana harsatna leh buaina lutuk awm lova kan kawng leh hmunte peih fel turin tunah hian ruahmanna siam chhoh zel a ni bawk. Heng hmasawnna hna thawhnaah hian mipui leh lirthei khalhtute hriatthiamna leh dawhtheihna SIPMIU hotute leh hnathawktuten an ngen a, hetiang hna Aizawl veng hrang hranga an thawh tawhna apiangah mipuiten kawng tha, faina leh thianghlimna kawnga hmasawnna leh hriselna tha zawk an neih phah zel an duhsakin an beisei a ni”.
