Nimin (November ni 9, 2017) khan Kamalanagar-a CADC Art & Culture Hall-ah Chakma Autonomous District Council (CADC) Chief Executive Member (CEM) 11-na atan Pu Amit Kumar Chakma chu Lawngtlai Bawrhsap ai awhin CADC Court President & Recorder chuan rinawmna thu tiamtirin a la lut.

Pu Amit Kumar Chakma hi 9th CADC-ah 15-Rengkashya MDC bial atanga thlan tlin niin, tun hi a tum khat MDC tlinna a ni a. 9th CADC-ah hian Dr BD Chakma, Pu Buddhalila Chakma leh Pu Kali Kumar Tongchangya te hnuah CEM palina a ni.

CADC-a Executive Committee-a member pariat awm zinga pali ngawtin banna an theh luh hnua CADC chu rorel thei lova a awm tak avangin July ni 4, 2017 khan Governor’s rule hnuaiah dah a ni a. Mizoram Governor thupeka July ni 10, 2017-a floor test neihah CEM ni lai Pu Kali Kumar Tongchangya chuan rin tawk hlawh zo lovin, Congress Legislature Party hruaitu atan Pu Amit Kumar Chakma chu thlan nghal a ni a. Hemi hnua Pu Amit Kumar Chakma’n Governor hnena CEM atana ruat tura dilna a thlen chu CADC inrelbawlna thila buaina hrang hrang awm avangin Governor chuan a tikhawtlai rih a. Hemia lungawi lo hian Pu Amit Kumar Chakma chuan Gauhati High Court, Aizawl Bench-ah petition theh lutin, thla hnih hnuah Court chuan CEM atana ruat turin thu a rel a. November ni 3, 2017 khan Mizoram Governor chuan CEM atana Pu Amit Kumar Chakma ruat remtihna hi a pe ta a ni.

Attachment

  • Loading attachment...