Vawiin khan Planning Minister Pu Lalsawta chuan 'BPL (Below Poverty Line) Baseline Survey 2016' a pisa-ah a tlangzarh.
Planning Minister Pu Lalsawta chuan thu sawiin sawrkar department hrang hrangin hnathawhna atan leh Mizoram dinhmun hriatna atana tangkai em em BPL Baseline Survey 2016 buatsaih a ni chu lawmawm a tih thu a sawi a. Sawrkar laipuiin tehna a hman- Tendulkar Committee in rawtna a siam te, United Nations in tehna a siam te zulzuiin baseline survey kaihhnawih department-Rural Development Department, UD&PA, LAD, FCS&CA GAD leh khawtlang hruaitute nena thawhhona hnuaia buatsaih a nih thu a sawi a. Champhai District chhunga khaw 5 - Pamchung, Rabung, Tlangmawi, Chawngtlai leh Riangtlei chu BPL chhungkaw awm lohna an nih thu sawiin chhuanawm a tih thu a sawi a. BPL Baseline survey hi thil hautak tak a ni a, khaw tina BPL chhungkaw hotu hming, chhungkaw member zat, thla khata pawisa lakluh zat, house no. leh voter ID no. thlenga tarlan a ni a, uluk taka buatsaih niin chhut sual palh leh thil dik lo alo awm palh a nih pawhin Directorate of Economics & Statistics hotute leh hnathawkte chu hemi chungchangah hian an inhawng hle a ni, a ti a. Hetianga chipchiar taka BPL baseline survey buatsaih hi India ram state dangah pawh an tam loh thu a sawi tel a ni.
Planning & Programme Implementation Department hnuaia Directorate of Economics & Statistics chuan ‘One State-One Statistics’ tih thupui kalpuina tihlawhtlin a nihna turin kum 2016 atang khan BPL Baseline Survey a bei a. Mizoram chhunga BPL chhungkaw awm zat Provisional Report hi June 2017 khan tlangzarh a ni tawh a. Siamthat leh tihthat ngai enfel a nih hnuin ‘Final Report’ tihchhuah a ni ta a ni. BPL Survey hi India Statistical Strengthening Project (ISSP) hnuaia peng pakhat a ni a, Directorate of Economics & Statistics hnuaia Mizoram Statistical Development Agency (MSDA) chu ISSP kengkawhtu an ni a. BPL Survey hi State Level Monitoring Committee kaihhruaina hnuaia kalpui a ni a. District tina DC kaihruaina hnuaiah District Level Monitoring Committee din niin Local Council hotute leh thingtlang khaw tina Village Council hotute kaihhruaina hnuaiah Local/Village Level Monitoring Committee din a ni bawk.
BPL Baseline Survey Report in a tarlan danin:
1)Mizoram chhunga BPL chhungkaw zat awm chu 56,584 niin chhungkaw awm zawng zawng atanga chhutin 19.63% a ni.
2)Lawngtlai District-ah BPL chhungkua 13162 an awm a, BPL Chhungkaw tamna ber district a ni.
3)Chhungkaw awm zawng zawng atanga chhut erawh chuan Mamit District a sang ber a, 35.64% niin Champhai District-ah BPL chhungkua an tlem ber a, 9.35% a ni.
4)BPL chhungkua awm miahlo khuate chu- Pamchung, Rabung, Tlangmawi, Chawngtlai leh Riangtlei niin Champhai District vek an ni.
Economics & Statistics Director Pu Lalchhuanawma Hrahsel chuan BPL baseline survey chungchangah report kim chang takin a pe a. Planning Department leh Directorate of Economics & Statistics hotute leh hnathawkte an tel a ni.
