Vawiin chawhnu khan Trade & Commerce and Industries buatsaihin Hrangturzo bial chhunga NEDP kaltlanga hamthatna dawngtute hnenah Puanthui khawl sewing machine leh Mistiri bungrua Carpentery tool te BNREGS Building, Biateah sem a ni. He hun hi Pi Vanlalawmpuii Chawngthu, Cooperation, Sericulture leh Fisheries changtu Minister leh bialtu MLA ni bawk chuan Khuallian niin a hmanpuia, tanpuina hi a semchhuak a ni.

Pi Vanlalawmpuii Chawngthu chuan sawrkarin mipuite mamawhna hria a, Department kaltlanga tanpuina a sem chhuak thin chu lawmawm a tih thu a sawi a. Sawrkar tanpuina chu a dawngtuten eizawnna ngelnghet an neih theihna tura an chhawr tangkai thiam a tul a ni tiin, a nihna tur ang taka hmang thiam turin a fuih nghal bawk a ni.

He hun hi Pu RV Hluna, Biate VCP chuan a kaihruai a. Vawiin hian avaiin Puanthui khawl 33 leh Mistiri bungrua 17 semchhuah a ni.