Vawiin khan MZP Hqtrs. Biate buatsaihin HSLC leh HSSLC Examination 2018 a zirlai tithate chawimawina hun Zialung Community Hall, Biateah hman a ni a, he hun hi Cooperation, Sericulture leh Fisheries Department changtu Minister Pi Vanlalawmpuii  Chawngthu chuan khuallian niin a hmanpui a ni.

Khuallian chuan Zirlai hlawhtlinna changte chu thinlung taka a lawmpui thu leh tuna an hlawhtlinna chan chu a bul tanna kailawn mai a la nih thu a sawi a. Hlawhtling tur chuan malsawmna dawng tlaka taihmak chhuah angai a ni tiin, Zirlaite chu inthlahdah mai lova tang sauh sauh turin a chah a. Zirlaite chawimawina hun neih chu lawmpuina thilpek mai bakah an kal zelna tur atana infuih tharna leh cho phurtu anih thu leh rah chhuah tha tak a neih a beisei thu a sawi a. Mi thiam leh fing apiang ten an thiamloh tam zia an hria a an inzir belh zel ang hian Zirlaite chu thiam thil zir kawnga tawp chin neilo turin a chah a, amah ngei pawhin nitin nunah thil thar a zir ve zel thin thu a sawi a ni. 

Pi Vanlalawmpuii Chawngthu chuan hnam fing leh changkang apiangin nu leh pa te an zahin an chawimawi thin thu sawiin, zirlaite pawh nun dan hmang leh Zirna huanga hlawhtlinna hmanga nu leh pate chawimawi ve thei tura tan la turin a fuih a. Zirlai kalkhawmte chu Zirlai bahlah phah khawpa khawtlang leh kohhrana inhmang rih lo turin a chah a. Zirlai te hlawhtlinna phena tha thawhtu pawimawh tak Zirtirtute chu fakawm a tih thu sawiin, zirlaite chuan Zirtirtute thu an awih thin avangin an kaihhruaina chu zirlaite tana malsawmna a ni, a ti a. Tunlai chhanah ram leh hnam chawisanna leh humhimna chu Zir thiamna lama tan lak thar anih thu leh ram inrelbawlna fawng chelh thei tura tan lak angaih thu a sawi a, hemi tur hian All India Level exam te paltlang thei tura tanlak a tul tawh tak zet  a ni, a ti.

Minister chuan ram leh hnam humhimna turin hnam nun ze mawi chawinun zel leh Mizo tawng hman fimkhura chawisan a ngai a ni, a ti a. Kawppui zawn kawngah pawh fimkhur a tul thu leh mahni Mizo pui ngei thlang thin turin kalkhawmte chu a chah a. Zirlaite chu tum mumal tak nei tur leh eizawnna kawngah sawrkar hna chauh zawng lova hna tha dangte zawn hreh lo turin a chah a. Nu leh pa te chu fate leh kawppuite chin chang hre thin tur leh abikin sex education chungchang inzirtirna chu nu leh pa leh Zirtirtute chu ngaipawimawh thin turin a chah bawk a ni. 

Hrangturzo bialtu MLA chuan a bial chhunga NGO te inkarah thawhhona tha tak awm thin chu fakawm a tih thu leh a thlawp tlat thu a sawi a. Faina kawnga Biate hmalakna chu fakawm a tih bakah a bial chhunga khaw pahnih Biate VC leh Khawlailung VC ten an awmna District Champhai leh Serchhip District chhung ve ve a VC hnathawk tha ber lawmman an dawng chu thinlung taka a lawmpui thu a sawi bawk a. Biate kawn waiting shed bulah Community Toilet siam anih tur thu Khuallian chuan a sawi a. Hlawhtling kan tihte hi thawkhleh khata hlawhtling nghal thut an awm lo va, an hlawhtlinna kawngah hian harsatna leh mangannate, lungngaihna tam tak an tawh thin thu a sawi bawk a ni. 

Zirlai thi tha chawimawina hunah hian Biate khaw Zirlai HSLC Distinction-a pass  3, First division 6 te leh HSSLC Distinction-a pass 1 leh First Division-a pass 6 te bakah hian PhD hmu thar 1 hnenah chawimawina thilpek hlan a ni a. Letter hmuhna subject teacher te hnenah chawimawina thilpek hlan a ni bawk. 

He hun hi Tv C. Lalrindika President, MZP Hqtrs. Biate chuan a kaihruai a. Tv H. Lalsiamtluanga MZP Hqtrs. Biatein report a pe a. Pu RV Hluna, VCP Biate leh Pu Michael Lalramsanga, Treasurer, MZP General Hqtrs. te pawhin thu an sawi bawk a. Pu Aldrin R. Lalhriatpuia Treasurer MZP Hqtrs. Biate chuan lawmthu sawiin he hun hi a khar a ni.

 

Attachment

  • Loading attachment...