Mizoram Sawrkar flagship programme New Economic Development Policy (NEDP) hnuaia hmalakna peng pakhat Entrepreneurship Development Scheme (EDS) kaltlangin vawiin khan Convention Centre, Lungleiah Mizoram pum huap leh a hmasa ber atan ‘Mizoram Entrepreneurship Conclave 2018’ neih tan a ni. He Conclave-in a tum ber chu mahni kut kea din tum te kawng kawhhmuh leh an mamawh hrang hrang te zirchianga entrepreneuship chungchang inhrilhhriat a ni. Pu Lalsawta, Minister of Finance, Planning etc chuan khuallian niin Conclave hi a hawng a. Mizoram State Entrepreneurship Development Monitoring Committee (MEDMOC) buatsaih ‘Report on Entrepreneurship Development Scheme’ lehkhabu a tlangzarh nghal bawk. Hawnna inkhawm ah hian sawrkar official-te, chanchinbumite, khawtlang hruaitute, tlawmngai pawl aiawhte leh zirlai thahnem tak an kalkhawm.

‘Mizoram Entrepreneurship Conclave 2018’ hawngtu khuallian Planning Minister Pu Lalsawta chuan Entrepreneurship Development Scheme (EDS) chu  ram hmasawnna chak taka kalpui anih theihna tura duangchhuah anih thu sawiin he scheme kaltlang hian  thalai tam zawk ten mahni kutkawiha eizawnna kawng an zawh theih nan nasa taka hmalak a ni, a ti a. Mizo thalaite sumdawnna bultan tum te tan nikum atang khan ‘Business Plan Contest’ (Mizoram Kailawn) leh Micro Start Up Capital (Mizoram Rahbi) hlawhtling taka kalpui niin Mizoram Kailawn hmalakna ah hian ramchhunga zirna in hlun berte zinga mi IIM Calcutta- Innovation Park te nen thawkhoin Entrepreneurship lama tui thalaite tan kawng an hawn sak mek bakah an bul tanna tur thlengin an ngaihtuahsak a ni, a ti. He hmalakna thar leh liantham tak phur taka tawiawm tu Mizoram mipuite chungah lawmthu sawiin Planning Minister chuan sawrkar Department hrang hrang te leh Mizoram hmun hrang hranga college Lecturer-te leh entrepreneurs te thawhhona hlawhtling tak chu ropui a tih thu a tarlang a. Mizoram chu sik leh sa nawmna ram, tawng khat hmanga inbiak theihna leh ziak leh chhiar thiam tamna ram a ni a, heng remchanna te hmang tangkaia ram hmasawnna khawlpui ni turin thalaite chu nasa taka tan la turin Planning Minister chuan a fuih a ni. Entrepreneur hlawhtling te chu mi dang tam takte tana malsawmna thlentu, mite eizawnna siamsaktu an nih avangin ram hmasawn zelna kawngah an pawimawh takzet a ni, a ti. Sawrkarin thalaite a ngai pawimawh a, an dinchhuahna tur leh eizawnna ngelnghet an neih theihna turin theihtawpin hma a la a. Mahni kut ke ngeia eizawnna kawng dap thiam ‘entrepreneurs’ thahnem tak kan neih theih nan sawrkarin hma a la chhunzawm zel dawn a ni, a ti. Sawrkarin EDS a kalpui zelna leh a hlawhtlin theihna tura theihtawp chhuahtu sawrkar officials-te, sawrkar departments, MZU, College Lecturer-te, MEDMOC member-te leh entrepreneurship-a inhmang leh tui mi zawng zawngte chungah lawmthu a sawi a ni.

He huna khualzahawm Pu Joseph Lalhimpuia, Chairman, Mizoram Youth Commission chuan Entrepreneurship lama thalaite fuihna leh chochhuahna hun tha tak, Mizoram pum huap leh a hmasa ber ‘Mizoram Entrepreneurship Conclave 2018’ Lungleia nghah a ni chu ropui a tih thu tarlangin thalaiten tangkai taka an hman theihnan duhsakna a hlan a.  Mizoram Youth Commission chuan, ‘Thalai te khawvel zauh ang aw, ’tih thupuiah neiin thalaite hmasawnna turin chak takin ke a pen mek zel a, India rama Coaching Centre hlun berte zinga mi ALS Delhi kaltlangin Online Coaching Centre a hawng tawh a, Lungleiah UPSC leh SSC Coaching te pawh kalpui zel a ni dawn, a ti. ALS Delhi nen thawhhona thuthlung ziah niin Corporate Social Responsibility (CSR) hmangin zirlai 100 an rawn sponsor tur thu a sawi bawk. Mizo thalai tam zawk ten Commonwealth ram hrang hrangah eizawnna an hmuh theihna turin IELTS Coaching pawh kalpui mek niin Mizoram Youth Commission chu Mizoram tan British Council hnuaia International English Language Testing System (IELTS) Examination Centre atan inremna neih a ni a; hei hi North East India-ah IELTS Examination Centre pangngai hmasa ber a ni dawn, a ti. Mizo thalaiten theihna tam tak an nei a, heng theihna te haichhuak turin sawkarin theihtawp a chhuah mek zel a, heng sawrkar hmalaknate ti hlawhtling turin mipuite thawhho puiah a sawm a ni.  

Vawiin ‘Mizoram Entrepreneurship Conclave 2018’ hawnna programme hi Dr. C. Vanlalramsanga, IES, Secretary, Planning and Programme Implementation Department-in a kaihruai a.  NEDP chungchang hrilfiahna hun hmangin tun dinhmunah Mizoramah hnathawk thei mihring zat (working age population) kum 15-59 inkar chu za zela mi sawmruk leh pali (64%) niin sorkar hnain a daih dawn loh avangin skill development leh entrepreneurship lamah tanlak a pawimawh hle a, kawng awmchhun niin a lang bawk a ni a ti. NEDP hmalakna peng pawimawh ber pakhat Entrepreneurship Development Scheme (EDS)-in a tum ber chu sorkar hna ringawta innghat lova mahni kutkawih eizawnna kawng zawh thei tura mipui, a bik takin thalaite buatsaih a ni a; he Scheme kalpuinaah sorkar chuan mipui mamawh - kawlphetha, kawng, tui, khawpui leh thingtlang lam tichangtlun bakah hmalakna apiang uluk taka vil chu a tih tur pawimawhah a dah a ni, a ti bawk.

Pu Isak Lalmuanpuia, RO, Planning Department-in ‘Entrepreneurship Development Scheme’ tih thupui hmangin zirtirna a pe a, Pi Zomawii Hrahsel, Award Winner ‘Vasundhara NorthEast Women Entrepreneur Award’ hnen atangin thusawi ngaihthlak a ni. Dr Lalrinchhana, Chief Planning Officer, HPC leh Member Secretary, MEDMOC ni bawk chuan lawmthu sawiin hun a khar.

Chawhnu lamah Technical Session buatsaih niin Lunglei khawpui chhunga Bank hrang hrang manager-te leh Entrepreneuship lama mithiam rual Master Trainer-te an rawn tel dawn a, entrepreneurship chungchang an sawiho a. Pu Joseph L. Ralte, Expert Member, MEDMOC-in “My Entrepreneurship Journey & Experiences with Financial Access in Mizoram” tih thupui hmangin ziritirna a pe a. Sawihona leh zawhna leh chhanna hun tha tak hman a ni. ‘Mizoram Entrepreneurship Conclave 2018’ hi naktukah neih chhunzawm a ni ang.

Conclave-ah hian Stall 26 buatsaih a ni a, 'Micro Start-up Competition' titha thlanchhuah ten Exhibition hmangin an thil siam an phochhuak a. 'Micro Start-up Competition' kalhmang leh he competition-a tel tura an inpuahchah dan te leh entrepreneurship lama hriat duhte heng Entrepreneurs-te hi an zawh theih reng bawk a ni. Exhibition hi vawiin tlai dar 5:00 thleng leh naktuk chawhnu dar 1:00 thleng mipuite tan hawn a ni a, mipui thahnem tak kalkhawmin hlut a hlawh hle a ni. MEDMOC chuan Mizoram Entrepreneurship Conclave hmasa ber ah hian mipuite a tam thei ang ber tel turin an sawm a ni.

Attachment

  • Loading attachment...