Education Reforms Commission kaltlanga Lunglei Education Complex sak tur chu tukin zing khan Planning Secretary Dr. C. Vanlalramsanga’n a hmunah a tlawh a. SDEO (S) Pu Vanlalchhana, DPC SSA Pu H. S. Zosangliana te leh Education Department Officer dang te’n an tawiawm a ni.

Chief Minister Pu Lal Thanhawla hmalaknaa din Education Reforms Commission hna kal zelah Lunglei Education Complex chu sak tan theih a ni tep a. Mizorama hmasa ber tur niin DEO office, SDEO (N&S), Adult Education, RMSA leh SSA te chu mipui tana dawr awlsam zawk nan hmun khatah an awmkhawm dawn a ni. Lunglei Education Complex project DPR hi retain tawh niin a sak nan cheng nuaih 1000 chuang dah a ni a. Sanction chhuah ruala thawk tan nghal thei turin sawrkar a inbuatsaih mek a ni. DEO Office, RMSA leh MBSE Regional Office-te chu Complex sak chhung hian hmun dangah insawn lailawk a tul dawn bawk a ni.

Education Minister Pu H. Rohluna leh Parliamentary Secretary Pu Joseph Lalhimpuia te hmalaknain zirlaite tana tangkai tur Planetarium siam tura Science & Technology Department-te ngenna chu tihhlawhtlin chhoh mek a ni a. Planning Secretary hian a hmunhma tur awm ang te a tlawh kual nghal a ni.

Mizorama planetarium puitling hmasa ber tur hi Lunglei khawpui chhunga dah tura ruahmanna siam niin a sakna tur hian NEC atangin cheng nuaih 370 dah tawh a ni a. Planetarium hi Science Centre changtlung zawka hlankai theih turin ruahmanna siam a ni bawk.